Allen^a) den, die disen brief ansehent lesent oder ho^erent lesen, kúndenn wir Johans vnd V^eli die Ho^ester || gebrůder vnd veriechent offenlich mit disem brief fúr v´ns vnd fúr all v´nser erben vnd nahkomen, || als v´ns Johans Valk der alt die gnad erworben hat von v´nserm gena^edigen herren apt Cůn apt || des gotzhus ze sant Gallen¹, wa^eri dz wir den akker, den man nempt Waltamúli², bûwtint vnd reban darin laitint, das denn der selb v´nser gena^ediger herr apt Cůn vsser dem selben ietz benempten akker vnd núwsatz sich wil lan des zehenden lan benu^egen, als der brief wist vnd sait, den wir dar vmb von im inne hand, da habent wir fúr v´ns vnd fúr all v´nser erben vnd nahkomen dem selben Hansen dem Valken verhaissen vnd gelopt mit v´nsren trúwen, das wir vnd v´nser erben vnd nahkomen im vnd sinen erben vnd nâhkomen all die bôm, es sigent velwen dûrr stûden vnd all bôm, wie die genant sint, die vff dem selben akkern oder vff dem v´nserr stand, die inen scha^edlichen sint oder schaden múgent bringen an iren bûwen vnd wingarten am Tannweg³ vnd an der hofstat, sont vss graben vnd vss ru^eten ân all widerred, vnd das wir noch dehain v´nser erben noch nachkomen dehain bômen weder velfen noch bôm noch do^err noch stûden noch kainerlay bôm v´ber all vff dem vorbenemten akker genant Waltamúli noch vff dem v´nsern weder zúgen noch setzen sont noch múgent, die dem selben Hansen Valken oder sinen erben vnd nachkomen scha^edlich sint oder schaden múgent bringen an den vorbenemten iren bûwen vnd wingarten am Tannweg vnd an der hofstat, ân all geuerde. Vnd des ze warem vrkúnd gebent wir die vorbenemten Hans vnd V^eli die Ho^ester fúr v´ns vnd fúr v´nser erben vnd nahkomen dem obgenanten Hansen Valken vnd sinen erben vnd nâhkomen disen brief besygelt mit des ersamen hern Chůnratz des Englers besta^ettes lútpriesters ze Bernang⁴ insygel, der sin^b) insygel fúr v´ns von v´nser bett wegen vnd fúr v´nser erben vnd nahkomen gehenkt hat an disem brief im vnd allen sinen erben vnd nahkomen gantzlich vnscha^edlich, des och ich obgenanter Chůnrat der Engler besta^etter lútpriester ze Bernang veriech mit vrkúnd dis briefes. Der geben ist ze Bernang am nahsten fritag nach sant Valentinus tag nach Cristi gebúrt drúzehenhundert jar, darnach in dem nún vnd achtzigestem jare.

Source Fulltext: Chartularium Sangallense X, Nr. 6309, S. 553-554.