Allen, die disen brieff ansechen oder hören lesen, khunden wir diß nachgenänten Hanns^a) von Steinach vnndt Cuonradt vnndt Hanns von Steinach¹ sein ehliche söhn vnndt verjechent deß offenlich ann disem brieffe, das wir alle dry gemeinlich mit guottem willen vnndt mit wolbedachtem muoth recht vnndt redlich eins schlechten ehwigen vnndt steten khauffes verckhaufft vnndt zueckhauffen geben hand für vnns vnndt all vnser ehrben vnndt nachkommen vnserem lieben öheim Ruodolffen von Rorschach² dem alten den hoff, der gelegen ist zue Golldach³, den mann nent deß Schachs hoff, mit allen rechten nutzen gewohnheiten vnndt zuegehörden vnndt für ledig vnndt vnansprechig. Darzue haben wir im den selben hoff auffgeben vnndt zue seinen handen bracht für recht frey eigenn mit deß hochwirdigen fürsten vndt herren vnsers gnädigen herren bischoffs Burckharts vonn Costanntz⁴ guetten willen vnndt gunst vnndt verhennggnuß, der im den selbigen hoff gefreyet hat vonn vnnser ernstlichen bätte wegen, vnndt auch das ich der vorgenannt Hanns von Steinach vnndt mein ehrben vnndt nachkommen die mülle, die gelegen ist zue Obren Steinach⁵, die mein eigen ist gwesen, zue lechen haben sonnd ann deß vorgeschribnen hoffs statt vonn einem herren bischoff zue Costanntz zue gleicher weise vnndt mit allen rechten, alls der vorgeschriben hoff lechen ist gewesen vonn einem herren vonn Costanntz, der khauff beschechenn ist vmb sechszig pfundt vnndt vier pfundt pfenning guetter vnndt genemer Costanntzer müntz vnndt wehrung, dero wir gänntzlich vonn im gewehrt sind. Vndt darumb so habenn wir vnns willenklichen verzigen vnndt verzichennt vnns mit disem brieffe für vnns vnndt alle vnsre ehrben vnndt nachkommen gegen dem vorgenannten Ruodolffen von^b) Rorschach vnndt gegen nachkommen gegen dem vorgenannten Ruodolffen von^b) Rorschach vnndt gegen allen denen, die den selbigenn hoff inne habenn, aller aigennschafft aller lechenschafft aller vorderung vnndt annsprach vnndt rechts, so wir zue dem vorgeschribnen hoff yhe gehattenn aldt yemer mehr habenn aldt gewünnen möchtenn vnndt solten vonn gewohnheiten oder von recht sunst oder inn dehein weise. Darzue haben wir im gelopt für vnns vnndt vnnser ehrben, deß vorgeschribnen khauffes vnndt deß hoffs mit allen den vorgeschribnen rechten für recht frey eigen recht wehren zue sein nach deß lanndts rechten vndt gewonheiten, allso mit dem gedinnge, was irrung vnndt annsprachen im aldt seinen nachkommen beschäche aldt widerfüere mit geistlichen aldt mit welttlichen leutten aldt gerichten, das wir das in richtig vnndt vnansprächig machen söllenn nach deß lanndtsrechten vnndt gewohnheiten ohne all geuärd vnndt ohne allen iren schadenn. Vnndt deß zue wahrem offem vrckhundt aller derre vorgeschribne dinng vnndt gedinnge so habenn wir die vorgenanten Heintz vonn Steinach vnndt Cuonradt vnndt Hans vonn Steinach sein ehliche söhne vnnsere innsigell offennlich gehenckht ann diseren brieff. Der gegeben ist zue Steinach inn vnnserer vesti, do mann zaltt vonn Christi gepurtt dryzechennhundert vnndt achtzig jähr, darnach inn dem neunten jahre, ann vnnser lieben frauwen abedt zue herpst.

Source Fulltext: Chartularium Sangallense X, Nr. 6353, S. 599-600.