Allen^a) den, die disen brief ansehent lesent oder ho^errent lesen, kúnden wir die nachgenemten V^eli Hyrt, den man || nemmet Buhli, burger ze Byscho^vffcelle¹ vnd Anna sin êliche husfro^vw vnd veriehint des o^vffenlich mit disem brief fúr v´ns || vnd fúr alle v´nser êrben, das wir mit wolbedahtem sinne vnd můt ainhelleklich reht vnd redlich verko^vfft vnd ze ko^vffenn geben || habint gemainlich den frômen erberen knehten Wa^eltin vnd Ru^edin den Riethmann von Zilschlatt² gebrůder bayden gemainlich vnd iren êrben, ob sú nit wa^erint, ain wise gelegen entzw´schent Zilschlatt vnd Singenberg³ vnd sto^vsset an des Blarrers gůt, die man nemmet Geltwis⁴, mit grunt mit grat vnd mit allen rehten nútzen vnd zů geho^erden, vnd ist dirre ko^vff beschehen vnd vollefu^ert reht vnd redlich vmb sehtzehen pfunt gůter phenning vnd gena^emer Costentzer múnsse, je zwein gůt haller fúr ainen Costentzer phenning, der selben phenning wir von inen gantzlich vnd gar gewert sigint vnd von inen enphangen habint vnd an v´nsern gůten nutz bekêrt habint, vnd ist o^vch dú vorgeschriben wis, die man nemmet Geltwis, v´nser reht lehen gewesen von dem erwirdigen gůten hailigen herren sant Gallen gotzhus, vnd habint o^vch die selben obgenanten wis mit allen rehten vnd ansprachen, so wir dar zů hatten ald haben mo^vhton, willeklich vnd frylich reht vnd redlich v^f geben vnd geuêrtgot vnd zů der vorbenemten Wa^eltis vnd Ru^edis der Riethman gebrůder handen braht von lehenherren, wie si sin notdurftig sint vnd dar an sú habent sint, also vnd in den rehten, das dú vorgenant wis hinnenhin mit allen rehten nútzen vnd zůgeho^erden der vorgenanten Wa^eltis vnd Ru^edis der Riethman gebrůder vnd iro êrben, ob sú nit wa^erint, reht lehen sin sol, vnd dar vmb so habint wir v´ns willeklich verzigen vnd verzihent v´ns mit disem brief gantzlich vnd gar fúr v´ns vnd fúr alle v´nser êrben der vorgenanten wis, die man nemmet Geltwis, aller aygenschaft aller lehenschaft aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so wir oder v´nser êrben, ob wir nit wa^erint, an der ald zů der vorgenanten wis jê gehebt habint ald no^vch hinnenhin jemer gehan ald gewinnen mo^ehtint. Wir obgenanten V^eli Hyrt, den man nemmet Buhli, vnd Anna sin êliche husfro^vw habint o^vch gelobt mit v´nsren gůten trúwen, das wir vnd v´nser êrben, ob wir nit wa^erint, der vorgenanten wis vnd ko^vffes reht wern súllint sin gen ma^enlichem an gaistlichem vnd an weltlichem geriht vnd an allen den stetten, wenn wâ ald wie dik sin die vorgenanten Wa^elti vnd Ru^edi die Riethman gebrůder vnd^b) ir erben, ob sú nit wa^erint, bedurfent vnd notdurftig sint. Vnd des ze vrkúnde der warhait vnd gantzer sta^eter sicherhait aller der ding vnd ko^vffes, so an disem brief geschriben stat, so han ich obgenanter V^eli Hyrt, den man nemmet Buhli, fúr mich, Annen min eliche husfro^vwen vnd fúr alle v´nser erben min insigel o^vffenlich gehenkt an disen brief. Der geben ist an dem na^ehsten ma^entag vor sant Angnesen tag in dem jâr, do man zalt von Cristus gebúrt drútzehenhundert jâr, ahtzig jâr vnd dar nach in dem núnden jâre.

Source Fulltext: Chartularium Sangallense X, Nr. 6304, S. 548-549.