Wir^a) Stephan von gotz gnaden phallentzgraf bei Rein vnd hertzog in Bayern¹ etc. vnd wir Johanns von den selben gnaden bischof zu^e Regenspurg² zu^e den zeiten dez egenanten hertzogen Stephan unsers gnedigen herrn chantzler vnd wir Eberhart || der ju^enger graf zu Wirtenberg³ bechennen vnd tun kunt offenlich mit dem brief fúr vns vnser helffer vnd diener vnd fúr alle die, die in dem lantfrid begriffen sind, alz wir vnd ander fu^ersten grafen herrn vnd dez reichs stet ainen || gemainen lantfrid gesworn haben vnd den miteinander halten, den der allerdurchlu^echtigest fúrst vnser gnediger herr her Wenczeßlaw Ro^emischer chu^enig zu^e allen zeiten merer dez reychs vnd chu^enig zu Behaim gemacht geordnet || vnd aufgesetzt hat vnd dez die chu^erfu^ersten fu^ersten herrn vnd stet miteinander v´berain cho^emen sind, der aber den erbern weisen den burgermaistern ra^eten vnd burgern der nachgeschriben stett Kostencz, V´berlingen⁴, Rafenspurg⁵, Lindaw^e6, sand Gallen, Wangen⁷ vnd Puchorn⁸ ettwaz zu^e swa^er zu^e herrt vnd ze vngelegen gewesen ist auszenemen vnd darum bedaht habent die kost vnd sâwmsaly, die in darúber gân múst, ee in dhein ir sach von dem egenanten lantfrid end vnd auztrag werden mo^eht, vnd darumb sein wir von dez vorgenanten vnsers herrn dez Ro^emischen ku^enigs empfelhen vnd andrer fu^ersten vnd herrn wegen auf si getzogen vnd bekriegt haben, si dartzu^e ze halten vnd ze weisen, daz si denselben lantfrid ausgenomen hetten, darumb aber der edel wolgeborn vnser liber lantgraf Sigyobst zum Leuctemberg⁹ graff zu^e Halls¹⁰ vnd lantuogt in Ober vnd in Nider Swaben zwischen vns vnd den vorgenanten steten geta^edingt hat, alz daz hin nach geschriben stet. Bei dem ersten daz die egenanten stet vmb den See¹¹ beleiben sullen bei allen iren freyhaiten rehten briefen vnd guten gewonhaiten, die si von chu^enigen vnd von chaysern bizher gehebt vnd herbraht habent, so su^ellen si auch beleiben bei irm punt, den si miteinander haltent vmb den See, alz lang vnd der obgenant lantfrid geordnet vnd gemacht ist, vnd sullen in den lantfrid niht treten vnd sullen in dez vnd auch der berihtigung, so wir ietzo mit in getan haben von dem egenanten vnserm herrn dem Ro^emischen chu^enig ainen besta^etbrief schaffen vnd auzrihten, daz ez dabei beleib. Auch ist geta^edingt, daz alle vnd ieglich zuspru^ech vodrung vnd ansprach, die wir vnd ander fu^ersten grafen herrn ritter vnd kneht biz auf disen hewtigen tag, alz dirr brief geben ist, zu^e den vorgenanten steten vnd den irn gemainlich oder besunder ie hetten gehebt habent oder gehaben solten oder mohten, ez sei von prant rawb manslaht oder von andrer sach wegen, wie die all genant oder gehaißen sind, nihtzniht auzgenomen, die sich von dez kriegs wegen verlau^effen vnd ergangen hetten, gantzlich abgesu^ent vnd verriht sein lawterlich vnd allerding, also daz wir noch die vnsern, die vns zuuersprechent stand, noch niemant von vnsern wegen si noch die irn darumb nymmermer nihtsniht angeraichen zugesprechen bechumern noch bechrencken sullen noch wellen in chainen weg. Auch ist geta^edingt, alz der vest ritter vnd sunder lieber Johanns der Truchsa^ezz von Waltpu^erg¹² mit sambt ettlichen andern vnsern dienern in den kriegen, die ietzo zwischen vns vnd den steten gewesen sind, nidergelegen vnd geuangen sint, daz si da denselben Truchsa^ezzen ledig vnd loz sullen laßen nach lawt vnd sag der brief, die er den vorgenanten steten besunderlich fúr sich selb gegeben hat, vnd also wenn wir den vorgenanten besta^etbrief von dem vorgenanten vnserm herrn dem Ro^emischen chu^enig auzbraht vnd den den von Kostencz in irn rat geantwurt haben, so sullen dann der egenant Johanns Truchsa^ezz vnd alle die andern, die mit im oder sust auf vnserm tail geuangen sind, vnuerzogenlich auf slehter vrfeche ledig vnd loz haißen vnd sein. Auch sullen der vorgenant stet geuangen alle aller gelu^ebde ayd vnd verpu^entnu^eß, die si mit irn ha^ewserr oder mit irr selbs leiben getan hetten, ga^entzlich ledig vnd loz sein lawterlich vnd allerding. Waz auch prantschatzung vorhanden vnd vnbetzalt wa^er, daz sol auch gantzlichen vnd gar auf baiden tailn absein. Sunderlich so haben wir vns mit den egenanten steten dez verainet, wa^er ez sach, daz iemant, wer der wa^er, der in dem lantfrid ietzo ist oder noch darein cho^emet, ez wa^ern fu^ersten grafen herrn ritter kneht oder stet oder die zu^e in geho^ernd, zu^e den oftgenanten steten gemainlich oder besunder oder zu den irn oder die vorgenanten siben stet oder die irn zu^e vns oder den vorgenanten fu^ersten grafen herrn rittern knehten oder stete oder den irn, die zu in gehornd, nu fúr sich hin iht prúch oder sto^eß gewu^ennen, die di vier stuck mort prant rawb vnd vnreht widersagen anru^erten, welhem tail der schad also widerfarn vnd beschechen wa^er, der sol auz den nachgeschriben viern mit namen graf Rudolffen von Montforrt herrn zu Veltkirch¹³, graf Eberharten von Nellenburg¹⁴, Johannsen von Hewen¹⁵ vnd Herman von Lanndemberg¹⁶ von Hagenweiler¹⁷ ainen gemainen man nemen vnd erweln, welhen si vnder den wellent, vnd zu dem súllen wir vnd die vnsern von vnserm tail zwen vnd die egenanten stet vnd die irn von irm tail auch zwen erber schidman setzen vnd geben, vnd dieselben fúmf su^ellen nach baidertail clag red vnd widerred daz reht darumb erchennen vnd auzsprechen, vnd von wederm tail sich da an dem rehten ervindet, der dem andern so^elichen schaden getan hat, dem man pillich widercheren sol, welher tail daz wa^er, der sol daz vnuerzogenlich nach allem seinem vermu^egen schaffen widerchert vnd widergetan werden an geua^erd. Auch ist geredt vnd geta^edingt worden von der bu^erger wegen, die die vorgenanten stet in disem krieg vnd vntz auf disen hewtigen tag zu búrger eingenomen vnd enpfangen habent, daz si die wol innehaben mu^egen vnd súllen a^vn ma^enichlichs irrung, doch auzgenomen, ob sich irr deheiner ainer oder mer von aigem willen her wider auz hinder seinen herrn setzen wolt, dem sullen si daz wol gu^ennen vnd erlauben, alz verr daz si sich vor mit in rihten su^ellen nach irr stet gewonhaiten vnd rehten an geua^erd. Auch ist beredt, daz die egenanten stet nu fúrbaz mer dheinen pfalbúrger niht mer einnemen noch enphahen súllen, ez seien dann edel la^ewt oder sust erberr la^ewt, die auf irn aigen gu^etern sitzent vnd mit niemant nihts ze schaffen haben, doch also daz dieselben dem herrn, dez zwinng vnd pa^enne daselbs sind, von irn gu^etern nach dem vnd denn dieselben iro gu^eter angepúrt, dannoht dienen sullen vngeuarlich. Auch sullen si niemant sein aigenla^ewt vnuerrechent amptla^ewt oder die nachvolgend krieg hettent oder die vor datum ditz briefs abtru^ennickait versworn oder verbriefet hieten, zu burgern enpfahen. Vnd daz allez geloben wir egenanten fu^erst vnd herre fúr v´ns vnd vnser helffer vnd diener vnd fúr alle, die mit vns in dem lantfrid begriffen sind, allez das sta^et zehalten vnd ze volfúrn, daz an dem brief geschriben ist. Mit vrchu^end dez briefs mit vnserm egenanten hertzog Stephans vnd vnser egenanten bischof Johannsen insigeln versigelten, darunder wir v´ns graf Eberhart der junger von Wirtenberg verpinden, wan wir aigens insigel niht gehabt haben, vnd geloben auch, allez daz sta^et zu halten, daz an dem brief von wort ze wort geschriben vnd begriffen ist. Der brief ist geben zu^e Weinga^erten¹⁸ an v´nser frawn tag der schidung nach Christi gepu^ert drewtzehenhundert jar, darnach in dem newn vnd achtzigstem jar.

Source Fulltext: Chartularium Sangallense X, Nr. 6345, S. 591-593.