Wir^a) diz nâchgenempten Hainrich von Ramswag, den man nemmet Hainrich Walther, vnd Eberhart von Ramswag gebrůder || Eberhartz sa^eligen von Ramswag¹ êlichen su^en tu^egint kûnt vnd veriehent offenlich mit disem brieue fúr vns vnd alle vnser || êrben allen, die in sehent lesent oder ho^erent lesen, daz wir baid ainhelleklich mit gůter vorbetrachtûnge den fromen vêsten || vnsern lieben vêttern V^olrichen vnd Burkarten von Ramswag gebrůdern Burkartz sa^eligen von Ramswag² êlichen su^enne gegûnnen vnd rêdlich vnd recht gelâssen habent vnser burghalden vor vnser vêsti ze Blatten³, die vnser aller gemain ist vnd vnser lêhen ist von dem êrwirdigen gotzhus ze sant Gallen, also vnd mit der beschaidenhait, daz die selben egenempten V^olrich vnd Burkart vnser vêttern die selben vorgedâchten burghalden von dem bilde hin vntz an daz gesess haben niessen vnd reben vnd winwachs dâr an vnd dâr inne zúgen vnd bûwen súllent, vnd vmb die kostung vnd arbait, die sú dârzů vnd dâr an haben vnd kêren můssent, daz sú die selben ietzgedâchten halden ze winwachs bezwingen, so haben wir vns baid vnd ietwedre besûnder sich verzigen vnd entziehent vns mit disem brieue willeklich vnd gantzlich vnd gar der selben vorgeschribenn burghalden búw vnd núzze, vsgenomen der bo^vm, die dâr inne sint ald noch hinnenhin dâr inne gezúget werdent, mit samlicher beschaidenhait vnd in dem rechten dinge vnd gedinge, daz wir noch vnser êrben noch niemant von vnsern wegen die vorgenempten V^olrichen vnd Burkarten vnser vêttern noch iro êrben an der vnd in der vorgeschribenn burghalden vnd búwen nû hinnenhin niemer mêr súllent noch wo^ellent sûwmen ierren noch in dehainen weg drengen mit dehainen sachen ân alle gefa^erde, vsgenomen die bo^vme vnd vnsri recht der bo^vm, die in der selben burghalden gezúget sint worden vff disen húttigen tag, alz dirre brief ist geben, ald noch hinnenhin gezúget werdent. Wa^ere aber, daz sú die selben vorgeschribenn irú recht der vorgedachten burghalden dehainest verko^vffen wo^eltint, daz sont sú vns oder vnsern êrben dez êrsten vor ma^englichem anbieten vnd ze ko^vffenn geben. Wa^er o^vch, daz sú baid abgiengint von todes wegen vnd daz dewedre vnder inen libêrben liesse, so sint vnd sont die selben vorgeschribenn irú recht der vorgedâchten burghalden vnd der búwe, die sú denne dâr an getân hettint, wider an vns vnd an vnser êrben lêdeklich vnd gantzlich vnd gar gefallen vnd ledig vnd los sin ân alle gefa^erde. Vnd ze offenem wâren vrkúnde vnd sta^eter sicherhait aller dirre vorgeschribenn dinge vnd gedinge so haben wir obgenanten Hainrich vnd Eberhart von Ramswag gebrůder baid vnsri insigel fúr v´ns vnd vnser êrben offenlich an disen brief gehenket. Der geben wart in dem jâre, do von Cristi gebúrt warent drúzehenhûndert vnd achtzig jâr vnd dâr nâch in dem núnden jâre, an sant Gallen âbent.

Source Fulltext: Chartularium Sangallense X, Nr. 6355, S. 601-602.