Wir^a) des hailigen Romischen rychs stette Costentz, Vberlingen¹, Rauenspurg², Lyndow³, sant Gallen, L Wangen⁴ vnd Buchorn⁵, die den bunt mitainander haltent vmb den Se⁶, alz wir vff dis zit ze Lindow L bi ainander gewesen sien, bekennen vns offenbar mit disem brieff vmb die stos krieg vnd missLhellung, die wir mit dem durluchtigen fursten hertzog Steffan von gottes gnaden pfallentzgrauen by Rine vnd hertzogen in Paigern⁷ vnserm gnedigen herren vnd mit dem hochwirdigen hern Yohansen bischoffen ze Regenspurg⁸ sinem cantzler vnd mit andren herren gehebt haben vnd darumb wir mitainander aigentlich vnd gutlich vnd ouch gar vnd gentzlich da ze Wingarten⁹ verricht sien, das wir die selben richtung¹⁰ wâr vnd stat halten sullen vnd wellen nach vswisung der houptbrieue, die wir darumb von den vorgenanten herren besigelt inne haben, vnd nach der hoptbrief vswisung, die si ouch darumb von vns inne hant, ane all geuerde. Vnd doch also merklichen ze wissen, das weder vns noch vnsern nachkomen noch den vnsern disiv tading vnd sach noch dirre gegenwurtig brieff an der tading vnd richtung, die wir mit dem edeln hern Yohansen dem truchsessen ze Waltpurg¹¹ besunder getan haben, vnd an den brieuen, die er vns darumb besigelt vnd gegeben hat, dehainen schaden komer noch gebresten bringen noch keren sol an dehainen stetten noch vor dehainen luten noch gerichten weder gaistlichen noch weltlichen noch in kainen weg. Vnd dez alles ze warem vnd offem vrkund so hant die vorgenanten vnser aidgenossen von Rauenspurg ir stat ynsigel von vnser aller haissentz wegen offenlich gehenkt an disen brieff. Der geben ist an vnsers herren lichnams tag nach Cristi gepurt drivzehenhundert vnd nivntzig jare.