Allen^a), die disen brief sehent oder horent lesen, kund ich Johans Erishopt vogt Zollikon², ze Stadelhofen³ vnd ze L Kussnach⁴ von der fromen wisen des burgermeisters vnd der rat der stat Zurich heissens wegen, das L Rudolf Wetzel burger ze Rappraswil⁵ vnd fro Adelheit sin eliche wirtin mit dem selben irem elichen wirt L vnd rechten vogt vnd er mit iro si beide vnuerscheidenlich vnd mit gesamnoter hant dise nachgeschriben guter, des ersten ir hus hofstatt vnd trotten Zollikon an der kilchen gelegen stossent an den weg, aber zwo hofstetten in dem kilchhof, aber ein juchert reben vnder dem selben hus stosset nidnan an den kilchweg anderhalb an die strass hindnan an das kilchturli, aber anderhalb juchert reben vor dem tor stossent einhalb an das kilchtôr vnd an die lantstrass anderhalb an Johans Wetzels vnd an des Wulflingers guter ze der dritten siten an die lantstrass obnan Johans Itsch­ners gut vnd nidnan an den mitelweg, vnd einen bongarten bi der lantstrass stosset hindnan an des Pfaffhusers gut einhalb an des Zuners gut mit steg mit weg vnd mit allem recht, so dar zu hort, mit miner hant willen vnd gunst der erberen frowen fron Adelheiten wilent her Peters von Hunaberg⁶ ritters seligen elichen husfrowen fur recht vogtber eigen, da fur das jerlich ein viertel kernen armen luten ze einer spend vnd da fur das jerlich vier schilling pfenning an die messen vnd an die kilchen Zollikon dar ab gan sol vnd nit mer, vmb zweihundert vnd drissig guldin guter vnd geber an gold vnd an gewicht recht vnd redlich ze koffen geben hant, des selben geltes och si nach iro vergicht gentzlich von iro gewert sint, vnd dar vmb so hant sich die egenanten Rudolf Wetzel vnd fro Adelheit sin eliche wirtin si beide vnuerscheidenlich gar vnd gentzlich entzigen alles rechten vordrung vnd ansprach, so si oder ir erben nach den vorgeschriben gutern mit allem recht, so dar zu hort, dekeine wise iemer gewinnen oder gehaben mochtin gen der obgenanten fron Adelheiten von Hunaberg oder gen iren erben mit geistlichen oder mit weltlichen gerichten ald ane gericht oder mit dekeinen andren sachen ane geuerd. Es hant och die vorgenanten Rudolf Wetzel vnd fro Adelheit sin eliche wirtin fur sich vnd ir erben mit guten truwen glopt, der vorbenempten guter mit allem recht, so dar zu hort, wer ze sinne nach recht der egenanten fron Adelheiten von Hunaberg vnd iro erben fur ir recht vogtber eigen vnd vmb den vorgeschriben kof vor geistlichen vnd vor weltlichen gerichten vnd mit namen an allen den stetten, wo vnd wenn ald wie dik si des notdurftig sint, ane geuerd. Wer och, das sich hienach iemer enpfund, das ab den egenanten gutren mer gienge denn das viertel kernen vnd die vier schilling pfenning, wie vil des wer, das sol der obgenant Wetzel, fro Adelheit sin eliche wirtin oder ir erben, ob si enwern, der vorgenanten fron Adelheiten von Hunaberg oder iren erben, ob si enwer, ane allen iren schaden entrichen vnd gentzlich ledig machen vntz an das viertel kernen vnd die vier schilling pfenning âne alle widerred ane geuerd. Vnd her vber ze einem offenn vrkund so han ich der vorgenant Johans Erishopt min insigel von beider teil bett wegen vnschedlich den burgern Zurich an ir vogtey vnd an allen iren zinsen vnd rechten vnd och mir vnd minen erben vnschedlich offenlich gehenkt an disen brief. Der geben ist an dem zehenden tag brachodes, do man zalt von gottes geburt druzehenhundert vnd nuntzig jar vnd dar nach in dem ersten jar. Hie bi warent Hartman von Hunaberg genant Wolf⁷ schultheiss der statt Zurich, Rudolf Bruno, Heintz Engelwart vnd ander erber lut.