Ich^a) Eberhart von Landsperg¹ tun kunt vnd vergich offenlich mit vrkund diz briefs fur mich vnd min erben allen L den, die in ansehent lesen oder horent lesen, daz der erber kneht Herman Bellmunt, der min reht aigen gewessen L ist, sich selber mit lib vnd mit gut vnd mit allen rehten vnd ansprachen, die ich zu sinem lib vnd zu sinem L gut hatt ald haben moht, von mir redlich vnd reht gekoft hat an daz erwirdig gotzhus ze sant Gallen, dannan er min lehen gewessen ist, vmb nun schilling pfenning Costentzer muns, der ich gantzlich vnd gar von im gewert bin vnd enpfangen han vnd an minen nutz bewent, den selben vorgeschriben Herman Bellmunt han ich mit lib vnd mit gut vnd mit allen rehten reht vnd redlich vff geben vnd geuertgot zu dez erwirdigen minez gnadigen heren abt Cun von gottez gnaden abt dez vorgeschriben gotzhus ze sant Gallen² vnd zu dez selben gotzhus handen, also vnd in dem rehten, daz der selb Herman Bellmunt mit lib vnd mit gut vnd mit allen rehten nû hinnenhin vnd iemer merr an daz obgenant gotzhus ze sant Gallen gehorren vnd dez reht aigen sin sol, vnd dar vmb so han ich mich willenklich enzigen vnd enzicht mich mit disem brief gantzlich vnd gar fur mich vnd min erben dez obgenanten Herman Bellmunten mit lib vnd mit gut vnd mit allen rehten aller aigenschaft aller manschaft aller lehenschaft aller kuntschaft aller gewêr lut vnd brief allez gaistlichez vnd weltlichez rehtez aller vordrung vnd ansprach aller reht vnd rehtung, so ich vnd min erben an dem zu dem vnd von dem digg genempten Herman Bellmunt lib vnd gutes wegen ie gehept han ald hie nach iemer gehaben oder gewinnen moht, vnd daz ich noch enkain min erb noch nemen andren an miner statt noch von minen wegen den vorgenanten minen gnadigen heren abt Cun noch enkain sin nachkomen noch daz vorgeschriben gotzhus ze sant Gallen oder den vorgenanten Herman Bellmunt sin lib^b) noch sin gut^c) iemer mer sollint noch mugint ansprechen vff triben bekumbren noch enkain wis beswaren weder mit gaistlichem noch mit weltlichem geriht noch an reht noch mit enkainer lay ander sache an all geuard. Ich han och gelobt mit miner trwu^d) vnd loben mit disem brief fur mich vnd min erben, dez vorgeschriben Herman Bellmunt mit lib vnd mit gut vnd mit allen rehten vnd zugehorden vnd dez kofs wêr ze sind nach dez landez reht vnd och den vorgeschriben mins gnadigen heren abt Cun vnd siner nachkomen vnd daz vorgeschriben gotzhus ze sant Gallen vnd den vorgenanten Herman Bellmunt ze versprechen vnd ze verstane an allen stetten gen aller menklichem an allen iren schaden, wenn vnd wa vnd wie digg su dar vmb an gesprochen geschadigot oder vff triben werdent mit gaistlichem vnd mit weltlichem geriht. Vnd dez ze ainem warem vrkund vnd gantzer sicherhait aller der vorgeschriber dinge vnd vergiht so han ich Eberhart von Landsperg fur mich vnd min erben min aigen insigel offenlich gehenkt an disen brief. Geben ze Wil³ in der statt an sant Vlrichs abent in dem iar, do man zalt von Cristi geburt tusent druhundert ains vnd nunzig iar.