Wir^a) der burgermaister der rat vnd die burger gemainlich der stat ze Costentz L tun kunt vnd veriehen offenlich an disem brief allen, die in sehent oder horent L lesen, daz vns die wisen der burgermaister der rat vnd die burger geLmainlich der stat ze sant Gallen vnser aidgnossen geben beriht vnd gantzlich gewert vnd vsgeriht hant siben vnd sibenzig phunt ân ainen schilling phenning alles guter Costentzer munse, der si vns schuldig wurden bi ir an zal, alz gemain stet vnsers bundes vmb den Sew¹ nv nahst ze Buchorn² vff den nahsten donstag vor dem nahsten vergangenn sant Vallentis tag ain gemain rechnung taten. Darumb so lassen wir vnd sagent fur vns vnd fur alle vnser erben vnd nachkomen die selben burger vnd die stat ze sant Gallen vnd iro nachkomen der vorgedahten siben vnd sibenzig phunt aines schilling phennings minder, die si vns bi der vergangenn rechnung ir an zal schuldig waren, alz vor ist beschaiden, gantzlich quitt ledig vnd los mit vrkund diz brieues. Vnd des alles ze offemm warem vrkunde so haben wir vnser stat insigel ze Costentz getrukt vff disen brief. Der geben ist ze Costentz an dem nahsten donstag nach sant Vlrichs tag, anno domini M^mo.CCC^mo LXXXX^mo primo.Chonradus Sachs prothonotarius Constan(ciensis)^b)3