Wir^a) der amman vnd alle burger gemainlich arme vnd rich der stat ze Rinegg¹ tunt kvnd vnd vergehen des offenlich an disem L brief allen, die in ansehent oder horent lesen, von des koffes wegen, als die edeln wolgebornen vnser gnadigen herren graff Hainrich L von Werdenberg² herre ze Rinegg vnd graff Rudolf³ sin svn ze koffent geben hant dem beschaiden manne Hainrich Cristan burger L ze Costentz hundert pfunt haller geltz ab der vorgenanten stat ze Rinegg vnd vss allen den nvtzen, die si ze Rinegg vnd ze Tal⁴ dem kilchensatz hant, vmb funffzehenhundert pfunt haller, die inen der selb Hainrich Cristan darumb geben hett, die selben hundert pfunt haller si jarlichs richten sont halb vff sant Martins tag vnd daz ander halbtail vff sant Johans tag des Thoffers, als der hobtbrief⁵ wist vnd sait, den der selb Hainrich Cristan darumb besigelt inne hett. Da vergehen^b) alle gemainlich, daz diser koff vnser aller guter will ist, vnd sigint alle gemainlich vmb daz selb jarlich gelt gen dem selben Hainrich Cristan vnd gen sinen erben fur vns vnd vnser erben vnd nachkomen mit den selben vnsern gnadigen herren reht gelter vnd angulten worden vnd verbindent vns des mit disem brief, dem selben^c) Hainrich Cristan daz obgenant jarlich gelt im vnd sinen erben ze richtent vnd ze gebent ze den vorgenanten zwain ziln vnd mit allen den gedingen vnd rehten, als der obgenant hobtbrief wist vnd sait. Taten wir des nit, so mag der selb Hainrich Cristan vnd sin erben daz selb jarlich gelt an schaden vff vns nemen vnd mugent vns darumb alle gemainlich oder ieglichen besvnder mit pfandvng mit verbieten vnd heften angriffen vnd sol vns da vor nvt schirmen in aller der wise vnd mass vnd mit allen den gedingen vnd rehten, als daz alles der hobtbrief wist vnd sait, der daruber besigelt geben ist. Vnd ze warem vnd offenn vrkvnd aller dirre ding, won wir nit aigens insigel habent, so habent wir gebetten die obgenanten vnser gnadigen herren von Werdenberg vnd och den fromen vesten Vlrich Habk stettamman ze Costentz⁶, daz si iru insigel gehenkt hant an disen brief, vnder dv selben insigel wir vns alle bindent ainer gantzen warhait aller vorgeschriben ding. Des vergehen wir die vorgenanten graff Hainrich vnd graff Rudolf von Werdenberg, daz wir von iro bett wegen vnsru insigel gehenkt habent an disen brief, won si och hinder vns gegangen sint von vnser bett wegen. Darnach so vergich ich der obgenant amman, daz ich von ir aller bett wegen min insigel gehenkt hab an disen brief, won si och dis alles vor mir vergehen hant, doch mir vnschadlich. Dirre brief ist ze Costentz geben, do man von Cristes geburt zalt druzehenhundert jar, darnach in dem zwai vnd nuntzigosten jar, an sant Johans abend des Thoffers.