Wir^a) der amman der rat vnd die burger all gemainlich rich vnd arm der statt ze Veltkilch¹ veriehent L vnd tugint kund aller manglichem mit disem offenn brief fur vns vnd all vnser erben von der sach vnd L des kôffs wegen, als wir dem erbern wolbeschaidenn man Hainrichen Bundrich ze Costentz vnd sinen erben ains L redlichen kôffs ze kôffent geben habint funftzig pfunt haller geltz vnd jarklichs zinses ab vnd vß vnserm gemainen winvngelt vnd och ab allen andren nutzzen, die vnser gemainu statt ze Veltkilch hât, vmb acht hundert pfunt Italiger haller, die wir also bar darvmb von im enpfangen vnd an vnsern vnd der selben vnser statt gemainen redlichen nutzz geben vnd bekert habint nach lut vnd sag des hoptbriefs, den er darvmb besigelt inn hat, vnd als wir die erbern wysen vnd wolbeschaiden vnser vast guten frund den amman vnd die burger all gemainlich rich vnd arm der statt ze Rinegg² gen dem selben Hainrichen Bundrich vnd gen sinen erben vmb das obgeschriben jarklich gelt du funfftzig pfunt haller ze rehten angulten mit vns vnuerschaidenlich versetzt habint, soll manglichem ze wissent sin mit vrkunde dis offenn briefs, das wir inen all gemainlich vnd vnuerschaidenlich mit vnsern guten truwen in aydes wyse geloppt vnd verhaissen habin, war ob si all gemainlich ald iro dehainer sunderlich der selben angultschafft jemer ze schaden kamint ald schadhafft wurdint, wie sich das gefugti ald von was sach das zuluff vngevarlich, das wir vnd vnser erben vnd nachkomen si vnd all ir erben vnd nâchkomen da von gar vnd gantzlich âne allen iren schaden losen ledigen vnd vnclagber machen sollint ân all widerred vnd gevard vnd vmb den selben schaden iren schlechten worten gelôben ân all ander bewysung. Vnd ze merer sicherhait so gebint wir inen vnd allen iren helffern vollen gewalt vnd fryes vrlob, das si vns all gemainlich vnd vnser iegklichen besunder vmb den selben schaden, ob wir inen den selben nit vssrichtint noch ablaitint, so si vns dârvmb ermant vnd angevordert hettint, dâr nâch wenn su wend wol angriffen hefften vnd pfenden sont vnd mugent an allen vnsren ligenden vnd varenden gutern in stetten vff wasser vnd vff dem land allenthalben, es sig mit gericht ald ân gericht, als lang als vil vnd als gnug, vntz das si des selben iro schadens gar vnd gantzlich âne allen iren schaden bezalt vnd vssgericht werdent ân gevard, vnd sont si noch ir helffer da mit in dehain wyse wider vns nit getân missuarn noch gefrafelt hân vnd sol och vns noch enkain vnser lut noch gut gemainlich noch sunderlich davor in dekain wyse nit schirmen weder gaischlich noch weltlich gericht gesetzt fryghait gnâd ban noch acht noch enkainer schlacht andrer schirm vsszug noch recht suß noch so ân all gevard. Vnd des alles ze wârem vnd offem vrkunde vnd ze ainer staten vesten sicherhait so habint wir inen disen brief hiervber besigelten geben fur vns vnd all vnser erben vnd nâchkomen mit gemainem vnser statt anhangendem insigel ze Veltkilch. Das geschach vnd ward och dirr brief ze Veltkilch geben des jâres, do man zalt von Cristus geburte druzehenhundert vnd im zwai vnd nuntzgosten jâr, an dem nachsten zinstag nâch sant Johans tag des Tôffers ze sunwenden.