Ich^a) Johanns truchsazze ze Waltpurg vergich vnd tun kunt aller menglichen mit disem offenn brieue, als vormauls der edel wolerborn grauff Aulbreht von Werdenberg herre ze dem Hailigenberg L der yunger vff ain sit vnd die fursichtigen wysen die purgermaister rate vnd burger gemainlichen der stete Costentz, Vberlingen vnd sant Gallen vff die andern sit vor mir als vor ainem L gemainen vnd vor den schidluten, die si von baiden tailn zu mir satzten, mit ainander von etlicher stuk vnd zuspruch wegen, die hienach benempt werdend, gerechtot hand vnd darumb in ze baidersit L ander tag vff dry viertzehen tag gen Walse beschaiden wart nauch dez spruchbriefs lute vnd sage, der von mir vnd den schidluten vormauls darumb vnd ouch vmb anderiv stuk besigelt vnd gegeben ist, also bekenne ich mich mit disem brieff, daz baid vorgenant tail vff disen hivtigen tag, als diser brieff geben ist, fur mich her gen Walse komen sind vnd div stuk gen ainander mit dem rechten wolten vsgetragen vnd berechtot han, wan daz ich mich mit hilff des edeln gravff Aulbrechtz von Werdenberg dez eltern¹ vnd anderr miner frunde vnd herren durch gemains lands nutz vnd frides willen daryn in solicher mavss leite, daz ir derselben vorgenanten stuk gentzlich vff mich kamend zu ainer gantzen lutren sune vnd rihtung vnd mir lobten, wie ich die selben stos entschiede vnd darumb vssprach, daz ouch si ze baidersit dabi beliben solten vnd wolten. Also han ich ouch gesprochen vnd sprich mit disem brieff, dez ersten als der obgenant grauff Aulbreht zu den egenanten dryn steten clegt von prand vnd mansleht wegen, den si im vnd den sinen in dem nachilen, als si vff in vnd die sinen nachilten, dez mauls do er grave Hartmann bischoffen ze Chur vieng, getan hetten vnd dez si ze baidersit vff mich vnd vff die schildute, die yetweder tail zu mir gesetzt hett, komen vnd gangen wauren zu der minne vnd nit zu dem rechten nach dez anlaz briefs sage, der darumb geben waz, vnd als die obgenanten dry stete zu im hinwiderumb clegten, daz er den ersten tag versezzen vnd den nit gesucht hett vber daz, daz in ehafft not nit geirrt hett, vnd damit aller stuk maynten vsgangen sin vnd die behept han, da aber im ertailt wart, daz er sweren solt aynen ayd zu den hayligen, daz in ehafft not geirrt hett, daz er vff den ersten tag niht moht komen von der ayd vnd puntnus wegen, als er sprach, daz er sich zu sinem bruder grave Hainrichen von Rynegg² vor ziten mit ayden verbunden hett vnd daz er yn der selben ayd gemant hett, sprich ich, daz div selben zway stuk gen ainander sond ab sin vnd verricht gentzlich vnd gar luterlich vnd aller ding. Darnach sprich ich von der obgenanten von Vberlingen burgers dez Ruden wegen, als den der obgenant grauff Aulbrecht vom Hayligenberg der yunger e dez mauls, daz er ir burger wurde, versetzt hat vnd ouch im daz syn darzu gehefft hat vnd in sunderlichen yrrt an dem hoff ze Altenburren³, da Stoll vff sitzet, den derselben Rud von erbs wegen anspricht vnd ym ze erbe geuallen sy, also daz sich derselbe Rud mit sinem aigenn gut losen sol, wa er in versetzt hat, ane sinen schaden. War aber, daz der selbe gravff Aulbrecht oder die sinen von dehainer schuld wegen, da er hinder ime dehainen schaden empfiengen oder furo angeraicht wurden, dauon sol er yn vnd die sinen entrihen ledig vnd los machen, dawider so sol der selbe grave Aulbreht den selben Ruden vnd daz syn entschlahen vnd in vnd daz sin ledig vnd los lazzen vnd yn daran furo nit mer bekumbern noch bekrenken, vsgenomen ob ym hubgelt ald vogtrecht vs dehainem sinem gut gieng ald daz darvff hette, daz sol er im allwegen yetzo vnd hienach gutlichen vollgen lan rihten vnd geben ane alle widerred. Ware ouch, ob sich der selb Rud gern vnd von frygem willen wider hervz vnd hinder den selben vorgenanten graven Aulbrehten ziehen wolt, des sond ym die obgenanten von Vberlingen wol gunnen. Vnd von dez obgenanten hofs vnd erbes wegen ze Altenburren han ich si ietzo mitainander veraint, also daz si des komen vnd gangen sind vff hern Egloffen von Landenberg⁴ als vff ainen gemainen, vnd der sol in ze baydersit kurtz tag darumb beschayden vff daz gut, vnd mag yetwedr tail zwen ald dry erber schidman zu im setzen, welich ietweder tail wil, vnd sond da an ainem rechten erfinden lan, wer zu dem erbe vnd gut recht habe, da by sol es denne beliben. Sunderlichen so han ich gesprochen von der obgenanten von sant Gallen burgers wegen dez pfaffen von Roschach ⁵, alz si dem egenanten grave Aulbrechten zusprachen, er hette den beschedigot vnd waren si vnd er dez ze grossem schaden komen, wan der vormauls dem selben gravff Aulbrechten solichiv ynstrvmenta sub publica manu gegeben vnd sich dez gen im verschriben hat, waz im von im oder den sinen in dem, do er grauff Hartmann bischoffen ze Chur, der do sin vigend waz, vieng, beschehen war, daz er daz nit clagnen wolt vnd ym layd war, daz daz die obgenanten von sant Gallen getan hetten, vnd ouch si darumb nit gebetten hette, daz ouch er den selben von sant Gallen noch dem pfaffen darumb noch vmb dehainerlay schaden, die dauon vffgeloffen oder gewachssen sind, nihtzit weder hafft noch gebunden sin sol in kainen weg. Vnd also sprich ich obgenanter Yohans truchsazze, daz bayd vorgenant tayl by den gelubten, die si mir darumb getan hand, bi den egenanten minen spruchen gentzlichen beliben vnd die halten sullen ane alle geuarde vnd argelist, vnd sond ouch div selben vorgenanten stuk darvff gentzlichen verriht sin luterlich vnd allerding vnd ouch ane aller menglichs irrung vnd widerrede. Vnd dez alles ze waurem vnd offemm vrkund so han ich obgenanter Yohanns truchsazze ze Waltpurg gemainer man min aygen ynsigel offenlichen gehenkt an disen brieff mir selber ane schaden. Der geben ist dez nehsten samstags vor sant Bartholomeus tag dez hayligen zwelffpotten nach Cristy geburt drivtzehenhundert yare vnd darnach in dem zway vnd nvntzigostem jare.