Ich^a) Hainrich von Wittretswendi¹ der mêtzger burger ze sant Gallen tun kûnt vnd vergich offenlich mit disem brieue fur mich vnd fur alle min êrben allen, die in L sehent lesent oder horent lesen, daz ich mit wolbedâchtem mute vnd mit guter vorbetrachtûnge von den wisen wolbeschaidenn Nicolausen Rupreht, Vlrichen L Rudger vnd Johansen Eberlis phleger vnd maister der siechen dez spittâls ze sant Gallen² von dez selben spittâls wegen den akker, den man nemmet im Bifang³, L gelegen in Gêren³ vnd ainhalb stosset an Vlrichs Ortwins guter vnd andert an die strâsse, die vff den Rodmonten⁴ gât, vnd ze der dritten syten an die guter, die Hêrschi ze ainem êrblêhen von dem ietzgedâchten spittal bûwt vnd hât vnd von dem selben akker getailt sint, der selb akker dez vorgenanten spittals recht aigen ist, mit grûnd mit grât mit wûnn mit waiden mit waisen mit zwi mit holtz mit veld mit stegen mit wegen mit wasser mit wasserflussen mit allen rechten nutzzen vnd gewonhaiten vnd mit allen zugehorden recht vnd rêdlich enphangen han mir vnd allen minen êrben frowen alz mannen tohtren alz knaben ze ainem staten êrbzinslêhen vmb ainen staten zins, mit samlicher beschaidenhait vnd in den rechten dinge vnd gedinge, daz ich vnd alle min êrben den selben vorgenanten akker mit aller zugehorde in êren vnd vnwustlich haben niessen bûwen besêtzen vnd entzezzen sont, vnd sullent dem selben spittâl dâr von aller jarlich ie ze sant Martins tag ain phunt phenning guter Costentzer munse ze rechtem jarlichem zins ân furzug allen abgang ân alle minrûnge vnd ân allen dez selben spittâls vnd siner phleger schaden ân alle widerrêde geben richten vnd antwurten ze sant Gallen in der statt ân alle gefarde, vnd han dez selben spittâls phlegern ze êrschatz dâr vmb geben siben phûnt phenning guter Costenzer munse, die su an dez selben spittâls offenn nûtz bewendet hant. Welhes jâres aber ich oder min erben dem vorgenanten spittâl den egedâchten zins nit richtint vnd gabint gantzlich vnd gar ze den ziln vnd in den rechten, alz vor geschriben stât, vnd sich daz alz vil vnd alz lang verzug, daz zwen zins den dritten erlangitint vnd begriffint, wenn denn daz beschah, daz zwen zîns den dritten erlanget vnd begriffen hettint, so ist vnd sol der vorgeschriben akker mit allen zugehorden dem egedâchten spittâl zinsfellig vnd gantzlich vnd gar ledig vnd los sin vnd haissen vnd dannenhin von aller manglichem iemer mêr eweklich vnansprachig beliben vnd vnbekumbert ân alle gefarde. Ez ist och bedingot vnd berêdt worden, ware daz ich oder min êrben den vorgeschribenn akker alz wustlich hettint, daz dez vorgeschribenn spittâls phleger oder botten, die su dâr vf schiktint ze besehenn, dûnkti, so su ez besahint, daz ich oder min êrben den selben akker anders gehebt vnd gehalten hettint, denn wir soltint, so sullent die selben phleger oder botten, wer die warint, drij êrber man der nahsten nâchgebûren dârzu nemen vnd kiesen, vnd och ich oder min êrben sullent och drij êrber man der nahsten nâchgebûren dârzu nemen vnd kiesen, vnd sullent denn die selben sechs man den vorgeschribenn akker vnd guter besehen, vnd ware denn, daz die selben sechs man oder der mêrer tail vnder inen sich dez erkandint, daz ich oder min êrben den selben akker in samlichen êren gehebt hettint, daz wir vnstraffbar warint, dez soltint wir geniessen vnd vngestrâfft dâr vmb werden. War aber, daz sich die selben sechs man oder der mêrer tail vnder inen sich dez erkandint, daz ich oder min êrben den selben akker wustlicher vnd anders gehebt vnd gehalten hettint, denn wir soltint, daz sullen wir vnuerzogenlich bêssren nâch erkantnûsse vnd haissenn der selben sechs manne oder dez mêrern tailes vnder inen. Ware aber, daz die selben sechs man nut ain mêrers vnder inen gemachen mochtint, die selben sache ze entschaidenn, so mûgent die selben sechs man ain sibenden man zu inen nemen, welhen su wollent, der inen die selben sache helff entschaiden in allen den rechten vnd gedinge, alz vor geschriben stât. Ez ist och bedingot vnd berêdt worden, ware daz dez vorgeschribenn spittâls phleger, wer die warint, dehaines jâres von dez selben spittâls rechten gân vnd die verkoffen woltint von dem vorgenanten akker vnd êrbzinslêhen, so sont su mir oder minen êrben die selben iru recht dez vorgenanten akkers dez êrsten vail bieten vnd vor manglichem ze koffenn geben funf schilling phenning Costenzer munse naher vnd baz denn iemant andre, ob wir su koffen wollent. War aber daz ich oder min êrben die selben iru recht nut koffen woltint ald mochtint, so mûgent doch denn dez selben spittâls phleger, wer die warint, dez selben spittâls recht dez vorgenanten akkers wol ze koffenn geben, wem su wollent, doch mir vnd minen êrben an vnsern rechten gantzlich vnschadlich. War aber, daz ich oder min êrben dehaines jâres von vnsern rechten des vorgenanten akkers vnd êrbzinslêhens gân vnd die verkoffen woltint, so sullen wir die selben vnsru recht dez vorgenanten spittâls phlegern, wer die warint, dez êrsten vail bieten vnd vor manglichem ze koffenn geben, och funf schilling phenning Costenzer munse naher vnd baz denn iemant andre, ob su sie koffen wollent, war och, daz su sie nut koffen woltint ald mochtint, so mûgent doch ich vnd min êrben die selben vorgeschribenn vnsru recht dannenhin wol ze koffenn geben, wem wir wollent, doch dem vorgenanten spittâl an sinen rechten gantzlich vnschadlich, vnd wem och denn ich oder min êrben die selben vnsru recht ze koffenn gebent, dem sont ez dez vorgenanten spittâls phleger, wer die warint, ân allen furzug lihen vmb den zins vnd in allen den rechten dinge vnd gedinge, alz an disem brieue geschriben stât, ân alle gefarde. Vnd ze offenem wâren vrkunde vnd stater sicherhait aller dirre vorgenanten dinge vnd gedinge so han ich vorgenempter Hainrich von Wittretswendi, won ich aigens insigels nut hatt, mich willeklich gebunden vnder dez wisen wolbeschaidenn Cunratz Vogelwaiders insigel och burger ze sant Gallen, der daz selb sin insigel von miner bette wegen fur mich vnd min êrben offenlich an disen brief gehenkt hât, dez och ich ietzgenempter Cunrat Vogelwaider vergich mir vnd minen êrben gantzlich vnschadlich. Diz beschach vnd wart dirre brief geben ze sant Gallen in dem jâre, do von Cristi geburt wârent druzehenhûndert jâr, nunzig jâr vnd dâr nâch in dem andern jâre, an sant Martins âbent.