Ich^a) graff Rudolf von Werdenberg vergich mênglichem mit disem brieff, alz ich vor ziten fur mich vnd L fur graff Hûgen von Werdenberg¹ minen bruder vnd fur all vnser erben vnd nachkomen den zehenLden, der vns jarlich gieng vnd gan solt vss vnd ab disen nachgescriben vier hofen, die gelegen L sind an dem berg ob Bernang² im Rintal, ab vnd vsser dem hôf genant hinder der Egg³ vnd ab vnd vsser dem hôff genant ann Blatten⁴ vnd ab vnd vsser dem hoff genant Kellerberg⁵ vnd ab vnd vsser dem hôf genant im Sûnder⁶, recht vnd redlich verlichen han ze ainem rechten vnd ewigen erbzinslehen vmb ainen jarlichen ewigen zins dem beschaiden Rudolf Herman von Bernang im Rintal vnd allen sinen erben nach im vmb drissig schilling phenning guter Costentzer muns jarlichs vnd ewigs zins aller jarlich vff sant Martis vns ze geben vnd ze richten, alz der lehen brief alles wol wiset vnd seit, den derselb Rudolf Herman darvmb von^b) vns inne hat mit minem angehenkten insigel versygelt, han ich aber fur mich vnd fur minen bruder graff Hûgen von Werdenberg vnd fur all vnser erben vnd nachkomen die selben drissig schilling phenning ewigs zins recht vnd redlichen och Rudolf Herman versetzt vnd ingesetzt ze ainem rechten phand vmb funfzehen phunt phenning der vorgen(anten) muns, dero ich gantz von im gewert vnd bezalt bin vnd an minen vnd mines bruders da vorgenant guten nûtz komen synd. Vnd ist dis versetzen beschechen in solichen rechten vnd gedingden, daz der selb Rudolf Herman vnd sin erben vnd ich im die selben drissig schilling phenning inne haben vnd niessen sônt, alz lang vnd all die wil, so si der vorgescriben funftzehen phûnt phenning von vns nit gewert noch bezalt sind, ân alle geuerde. Vnd des alles ze waren vnd stater sicherhait so han ich obgen(anter) graff Rudolf min aigen insygel fur mich vnd fur minen bruder graff Hûgen vnd fur all vnser erben vnd nâchkomen offenlich gehenkt an disen brief. Der geben ist an sant Martis abent nach Cristy geburt druzehenhundert jar vnd im andern jar vierzehen^c).