Allen^a) den, die disen brief ansehent lesent oder horent lesen, kund ich Johans Blârrer, den man nempt Stahelli, Fridrich Blârrers salgen êlicher sun burger ze sant Gallen vnd vergich offenlich an disem gegenwurLtigen brief, alz mich die frômen wisen der burgermaister vnd der rat ze sant Gallen gehaimot vnd in iro vanknust vnd banden hattent, vmb daz ich mich etwas uber sehen vnd verschult hatt vnd L den selben dem burgermaister vnd dem rat niht gehorsam sin wolt der dinge, so ich in billich gehorsam gewesen war, won aber su mich begnadot hant vnd mich durch min vnd durch miner frunde L ernstlicher bet willen ledig vnd vss der vanknust gelassen hant, darumb so han ich vorgenanter Johans Blârrer frilich willeklich vnd vnbetwungenlich vngebunden vnd vngeuangen mit guter vorbetrahtung offenlich gesworn ainen gelerten aide liplich zu got vnd zu den hailigen mit vfgehabenen vingern, vmb die vorgedahten vanknust vnd getat der vorgedahten des burgermaisters des rates vnd aller burger vnd burgerinen gemainlich der stat ze sant Gallen vnd iro ieklichs besunder vnd mit namen aller dero, wer die sint, die an der selben miner vanknust schuld gehebt hant haimlich oder offenlich mit worten mit raten ald mit getaten in dehain wis, luter gantz vnd gut frund ze sinne vnd alle min frund inen darumb ze frund ze gewinnen ân furzug vnd die selben vanknust vnd getat niemer ze andenn noch ze aferrenn weder mit gaistlichem noch mit weltlichem geriht noch ân reht weder mit worten noch mit werken noch in kain wis noch nieman andre an miner stat noch von minen wegen ân alle geuarde. Ich han och in den vorgedahten aide genomen vnd gesworn, war daz ich dehainer lay sach stoss oder ansprachen vff disen huttigen tag, alz diser brief ist geben, hetti oder hinnenhin iemer gewunne zu gemainer stat ze sant Gallen oder zu dehainem burger oder burgerinen besunder ze sant Gallen, wenne vnd alz dik das beschach, vnd wolti ich danne ie darumb rehtes niht enbern, daz ich danne ie darumb rehtes phlegen vnd reht von in sol vnd wil nemen ze sant Gallen in der stat vor irem geriht vnd niedort anderswa nach der selben stat reht vnd gewonhait, es war danne, das ich da selbs rehtlos gelassen wurde vnd das och daz da kuntlich wurd, so ist mir behalten vnd in dem aid vss gelassen, daz ich das reht ie danne, von dem ich danne rehtlos gelassen bin oder das mir da selbs widerhor worden war, anderswa suchen sol vnd mag, da ez danne billich vnd muglich ist, ân alle geuarde. War aber, daz got niht welle, das ich den vorgeschribenn aid vber fur ald ieman von minen wegen an dehainen vorgenanten stuken in dehain wise, so sol ich den selben burgern vnd gemainer stat ze sant Gallen zwai hundert phunt phenning guter Costentzer munse oder ander lay munse da fur, die ie dann ze sant Gallen in der stat fur so vil gutes geng vnd vngefarlich genam ist, gantzlich verfallen sin ze gebenn ân alle widerrede, vnd han och der selben gemainer stat ze sant Gallen hierumb zu mir ze ainer bessren vnd meren sicherhait ze rehten burgen geben vnd gesetzt diz nachgenemten erberen lut ieklichen vmb alz vil gutes, alz hie nachgeschriben stat vnd mit worten beschaiden ist. Des ersten Margarethen min êlichen husfrowen Hainrich Golders salgen von Marpach¹ êlichen tohter vmb funfzig phunt phenning, Nicolausen Rupreht vmb zehen phunt phenning, Georien Blârrer minen vettern vmb zwainzig phunt phenning, Steffan Blârrer sinen bruder minen vettern vmb zwainzig phunt phenning, Nicolausen Blârrer ir baider bruder minen vettern vmb zwainzig phunt phenning, Johansen Gnapser vmb zehen phunt phenning, Beringer Schulmaister vmb funf phunt phenning, Cristan Volin vmb funf phunt phenning, Gerwigen Payger vmb funf phunt phenning, Lienharten Payger vmb funf phunt phenning, Johansen Entziswiller vmb funf phunt phenning, Hugen Hofakrer vmb funf phunt phenning, Hainrich Zwiken vmb zwainzig phunt phenning, Hainrich Wissen vmb funf phunt phenning, Johansen Kochler genant Kuchili vmb funf phunt phenning vnd Johansen Atzen den jungern, den man nempt der Smid von Ainwille², vmb zehen phunt phenning, alle burger ze sant Gallen, die selben burgen alle hant mit mir gelobt ieklicher besunder mit siner truwe, ob das wari, daz ich in des selben gutes veruieli, alz vor ist beschaiden, daz danne die vorgenanten burgen alle den selben dem burgermaister dem rat vnd gemainer stat ze sant Gallen die selben zwai hundert phunt phenning gantzlich geben weren vnd rihten sont vnd in och gebunden sin sont, daz selb gut gantzlich ze gebenn vnd vszerihtenn ân allen furzug vnd widerrede vnd alle geuarde ieklicher besunder, alz vil als er gelobt hat vnd vor beschaiden ist, vnd war, das ich ald die obgenanten burgen inen das selb gut dann niht rihtint vnuerzogenlich ieklicher, so vil vnd er gelobt hat vnd da vor mit worten vnderschaiden ist, so hant die selben der burgermaister der rat vnd die burger gemainlich ze sant Gallen vnd iro helffer, wer die sint, friies vrlob vnd vollen gewalt, daz su mich vnd min erben vnd och die obgenanten burgen phenden noten heften vnd an griffen sont vnd mugent, doch ieklichen burgen vmb alz vil gutes, alz er gelobt hat, an luten vnd an gutern vff dem land in stetten vnd in den dorffern mit gaistlichem vnd mit weltlichem geriht vnd ân reht ân klag vnd ân zorn, wie vnd wa vnd wa hin su das getun mugent oder wellent ald in fugklich ist, vber alle frihait puntnust gnad lantfrid vnd gewonhait, alz vil vnd alz dik, vntz das su der selben zwai hundert phunt phenning von ieklichem, alz vil alz er gelobt hat, vnd och des schaden, in den su vnd iro helffer von des selben phenndens notens heftenns vnd angriffens wegen koment, gantzlich gewert vnd vsgeriht werdent, vnd sol mich noch min erben noch die obgenanten burgen noch min noch der selben burgen lut noch guter hie vor noch hie wider niht schirmen noch gut sin weder babstlichs kayserlichs noch kunglichs geriht gewalt gesetzt gnâd kain frihait kain gewonhait kain lantfrid kain buntnuss kain geselleschaft kain acht noch banne kain fund noch gesetzt, so ietz ist oder her nach funden gesetzt oder erdaht wurd von babsten kaysern kungen herren oder stetten noch kainer lay ander sach noch furzug. Ich han och gelobt mit miner truwe vnd loben mit disem brief fur mich vnd min erben, die vorgenanten burgen alle gantzlich ze losenn vnd vnschadhaft machenn von dem hoptgut vnd von allem dem schaden, in den su koment von diser burgschaft wegen, vnd han in och erlobt, min vnd miner erben gut darumb an ze griffenn ze phenden vnd ze notenn in aller der wise alz die obgenanten burgern ze sant Gallen, vntz in hoptgut vnd iro schad gantzlich abgelait vnd gewert wirt. Vnd des alles ze offem warem vrkunde vnd ze ainer staten sicherhait aller der vorgeschribenn dinge vnd vergiht so han ich Johans Blârrer da vorgenant fur mich vnd fur alle min erben min aigen insigel offenlich gehenkt an disen brief. Wir die obgenanten burgen Margaretha sin elichi husfrow, Nicolaus Rupreht, Geori, Steffan vnd Nicolaus die Blârrer gebruder, Johans Gnapser, Beringer Schulmaister, Cristan Voli, Gerwig vnd Lienhart die Payger gebruder, Johans Entziswiller, Hug Hofakrer, Hainrich Zwik, Hainrich Wiss, Johans Kochler vnd Johans Atz veriehen ain gantz warhait aller der dinge, so von vns an disem brief da vorgeschriben stant, vnd ze merer stater sicherhait der selben dinge so haben wir die ietzgenanten Nicolaus Rupreht, Geori, Steffan vnd Nicolaus die Blarrer gebruder, Johans Gnapser, Cristan Voli, Gerwig vnd Lienhart die Payger gebruder, Johans Entziswiller, Hugo Hofakrer, Hainrich Zwik, Hainrich Wiss vnd Johans Kochler all vnseru aigenu insigel offenlich gehenkt an disen brief, vnd won wir die obgenanten Margaretha Blarrerin, Beringer Schulmaister vnd Johans Atz aigener insigel niht haben, so haben wir erbetten den ersamen Jacob Rupreht, den man nempt Low, stat amman ze sant Gallen³, daz er sin insigel fur vns gehenkt hat an disen brief, vnder des selben insigel wir vns willeklich gebunden haben, des och ich obgenanter Jacob Rupreht offenlich vergich an disem brief mir vnd minen erben vnschadlich. Diz beschach vnd ward dirre brief geben ze sant Gallen an der nahsten mitwuchen vor sant Lucien tag in dem jar, do man zalt von Cristus geburt druzehenhundert jar, nunzig jar vnd darnach in dem andern jâre.