Allen^a) den, die disen brief an sehent oder horent lesen, kunde ich Johans von Mandach genant Hebstrit vnd vergich offenlich mit disem brief, als L ich von Heinrichs Ebneters Johans von Ebnetz saligen sun mines ohems, vnd des rechter vogt ich bin, vnd als ich von des L selben Heinrichs Ebneters wegen Johans Aster ze koffenne geben han die vogtigen ze Krilberg vnd ze Buch mit luten guetern L sturen vnd mit aller rechtung vnd zugehorde fur lehen von sant Gallen, da ich im daz mit dem selben Ebneter geuertiget vnd vf geben han, als der brief wol wist vnd seit, den der erwirdig herre apt Chun von sant Gallen vnd ich der vorgenant von Mandach versigelt hant. Vnd wan dieselben lute mit dem namen in dem vorgenanten hoptbrief nit begriffen vnd geschriben sint, dar vmb so sint dis die lute, die wir im ze koffenne geben haben vnd in die vorgenanten vogtigien gehorent, des ersten Jacob Herro, Johans Steiger vnd Mechthilt Grossin vnd ire kind. Vnd als der koff beschehen ist vmb vier vnd sehtzig phunt guter haller, der ich der vorgenant von Mandach, Henman vnd Bentelli von Mandach min sun des selben geltes gantzlich gewert sijen vnd wachsenten schaden da mit gewent hant, dar vmb so veriehen wir die egenanten Henman vnd Bentelli von Mandach, daz der vorgenant koff mit vnserm gutem willen vnd gunst beschehen ist, vnd geben och den dar zu wissentlich mit disem brief, also daz wir noch vnser erben den vorgenanten Aster vnd sin erben an die vorgenanten vogtigien luten vnd guetern mit aller zugehorde niemer gesumen noch geirren sond noch schaffen getan mit gerichten noch ane gerichte in keiner leig wis, won der vorgenant Ebneter noch nieman von sinen wegen kein vorderung noch ansprach dar zu niemer gehaben sond, vnd sagen och den vorgenanten Aster vnd sin trostung den Roten von Wil gantzlich quit ledig vnd los. Vnd des ze warem vrkunde so han wir die vorgenanten Johans von Mandach, Henman von^b) Bentelli von Mandach sin sun alle vnd vnser ieklicher sin eigen insigel offenlich gehenkt an disen brief. Der geben ist ze Winterthur an der heylgen kindlin tag ze wiennachten nach Cristus geburt drutzehen hundert iar, nunzig iar vnd dar nach in dem dritten jare.