Wir^a) graf Donat von Tokkenburg¹ graf ze Brettengo² vnd ze Tafaus³ tund kunt offenlich mit disem brief allen den, die in an sehent lesent oder horrent lesen, L das vff hut disen tag, als dirr brief geben ist, fur vns kam ze Mayenfelt⁴ in vnser vesti vnser lieber getruwer Hartwig von Sausch⁵ sesshaft ze Mayenfelt vnd offnot, dz sin vatter L salg an in braht hett daz tailer ampt ze Mayenfelt vnd war och sin lehen von vns, vnd batt vns, die selben lehen daz tailer ampt von im vf nemen an vnser hand vnd L du selben lehen lihen hin wider im, Kungunden vnd Elsbeten sinen elichen tohtran inan allen drien gemainlich. Do erhorten wir sin ernstlichen bett vnd nament du vorgenanten lehen mit allen rehten vnd zugehorden von im vf an vnser hand vnd lichent du vnd lihent och das selb tailerampt ze Mayenfelt vnd du lehen mit allen rehten nutzzen gewonhaiten vnd zu gehorden wissentlich mit disem brief hin wider dem obgenanden Hartwigen von Sausch, Kungunden vnd Elsbeten sinen elichen tohtran inan allen drien gemainlich, dz su das selb tailerampt vnd lehen gemainlich inne haben vnd niessen sond vnd mugint nach landes lehens vnd gemaindes reht. Wir hant och von besundern gnaden den vorgenanden tohtran Kungunden vnd Elsbeten die genad getan vnd tund si inan wissentlich mit disem brief, das su du vorgenanden lehen haben vnd niessen sond vnd mugint in aller wise vnd rehten, als ob si knappen oder man warint, vnd sint allu vorgescribnu ding vnd geding beschehen vnd vollefurt mit aller ehafti hantvesti gewarsami worten werchen raten vnd getaten, so dar zu gut nutz vnd notdurftig warent vnd dar zu gehort von reht vnd gewonhait. Vnd des ze vrkund vnd ze merer sicherhait aller vorgescribner ding vnd geding hant wir graf Donat von Tokkenburg da vorgenant vnser insigel offenlich gehenket an disen brief. Der geben ist in vnser vorgenanden vesti ze Mayenfelt an dem nachsten dunstag nach sant Agten tag der hailgen jungfrowen in dem iar, do man zalt von Cristus geburt druzehenhundert iar, nunzig iar vnd dar nach in dem dritten jar.