Ich^a) Ysal die Surgin¹ wilent Eberhartz seligen von Ramswag elich husfrôw, ich Hainrich Walther von L Ramswag vnd ich Cunrat Eberhart von Ramswag² gebruder ir elich sun, vnd ich Vli von Ramswag L vnd ich Burkart von Ramswag³ och gebruder tund kunt vnd veriehin offenlich fur vns vnd fur all vnser L erben mit disem brief, daz wir mit der erwirdigen in got frô Claren abtissenn vnser frôwen gotzhus ze Lindow⁴ lieplich vnd fruntlich in ain komen sint, daz der hoff ze Balgach⁵, der der obgenanten abtissenn vnd irem gotzhus zu gehoret, von aller der lute wegen, die in den selben hof ze Balgach gehorent, den wechsel hat vnd haben sol hinnenthin yemerme vnd êwklich gen vnserm hof ze Criesseren⁶ von aller der lut wegen, die in den selben vnsern hof ze Criesseren gehorent, also daz die selben obgenanten hof der ze Balgach vnd der ze Criesseren den wechsel von der lute wegen beidenthalb gen enander han sont hinnenthin êwklich in aller der wise vnd mit allen den rechten, alz es von alter her komen ist vnd alz von solichs wechsels wegen in diser gegen gewonlich vnd recht ist, âne all geuerd. Vnd dez allez ze offem vnd warem vrkund vnd stater ewiger sicherhait geben wir fur vns vnd fur all vnser erben vnd nachkomen der vorgenanten abtissenn vnd ir gotzhus vnd allen iren nachkomen disen brief daruber besigelt mit vnsren aigenen angehenkten insigeln. Dis geschach vnd ward dirre brief geben an sant Gerygen abent nach Cristus geburt druzehenhundert iar, darnach in dem driv vnd nuntzigosten jar.