Wir^a) Erhart von gotes verhengnust abt vnd der couent gemailich dez gotzhus ze Crutzlingen¹ sant Augustines orden in Costentzer L bystum gelegen tunt kunt aller menlich mit disem brieff, als vns die erwirdigen herren der abt vnd gemainer conuent dez gotzLhus ze sant Johann² in dem Turtal die erbren frowen Gerinen Hoffmaninen Hansen Hoffmans von Matzingen³ elichu tochter mit lib vnd L mit gut vnd mit aller zu gehort mit der selben Gerinen gunst vnd willen vnd von ir ernschlichen bett wegen ledklich zu vnsern vnd zu vnsern nachkomen vnd ze vnsers gotzhus handen vnd gewalt geben vnd geferget hand, die selb frow irs gotzhus aigen waz vnd die aber nun vnsers gotzhus man Vlin von Wutzenwiller⁴ Eberlis von Wutzenwiller elicher sun ze der e genomen hett, da bekennend vnd vergehend wir offenlichen mit disem brieff fur vns vnd fur alle vnser nachkomen, dz wir von besunder fruntschafft, so wir ze dem obgenanten gotzhus ze sant Johans in Turtal habend, vnd von ernschlicher flissiger bett wegen, so die erber frow Elsbett Eberlis von Wutzewill elichu tochter dar vmb an vns gelait haut, die vnsers gotzhus aigen waz vnd die aber nun dez obgenanten gotzhus ze sant Johann in Turtal man Hainin Hoffman von Matzingen ze der e genomen haut, die selben Elsbetten mit lib vnd mit gut vnd mit aller zu gehort mit guter vorbetrahtung vnd mit gemainem ainhelligem raut vnsers cappitels durch vnsers gotzhus nutz vnd fromen willen den obgenanten dem abt vnd gemainem conuent dez obgenanten gotzhus ze sant Johann in Turtal vnd allen iren nachkomen ze dez selben irs gotzhus handen vmb die obgenanten Gerinen Vlins von Wutzenwille elich wipp ze gelichem wehsell vnd in rehtes wehsels wiss ledklich vnd frilich geben habend vnd gebend in ouch redlich vnd reht mit disem brieff die selben Elsbetten Hainis Hoffmans von Matzingen elich wipp mit lib vnd mit gut vnd mit aller zugehord vnd in allem dem rehten, alz si vns vnd vnser gotzhus vntz her gehort hett, an geward, vnd habend inen ouch die selben frowen also mit aller zugehord fur aigen zu iren vnd zu ires gotzhus handen vnd gewalt braht vnd geuerget vnd si der in liblich nutzlich gewer gesetzt, als reht sitt vnd gewonlich was. Vnd habend vns hier vber an der selben Elsbetten Hainis Hoffmans elichu wirttenn mit aller zu gehord fur vns vnd fur alle vnser nachkomen vnd fur daz obgenant vnser gotzhus ledklich vnd frilich verzigen vnd entwert gegen dem obgenanten dem abt vnd dem couent ze sant Johanns in dem Turtal gegen allen iren nachkomen vnd gegen irem gotzhus vnd verzihend vns ouch redlich vnd reht mit disem brieff aller aigenschafft aller lehenschafft aller manschaft aller gewer aller kuntschaft aller besatzung aller zugnust aller dienst alles erbtails aller vall vnd gelazz aller rechtung vordrung vnd ansprach, so wir zu der obgenanten Elsbetten Hainis Hoffmans von Matzingen elich wirtenn mit lib vnd gut ie gehatten ald hernach iemer mer gewinnen mohten von reht ald von gewonhait ald von dehainerlay andren sach wegen an geuard. Wir sollen vnd geloben ouch fur vns vnd fur vnser nachkomen, der selben Elsbetten mit aller zu gehord fur aigen vnd dis wehsels dez obgenanten abts vnd gemaines couens^b) ze sant Johans in Turtal vnd iren nachkomen gen allermenglichem allenthalben, wenn wa ald wie dik si dez noturftig sint ald dar vmb mit dem rehten werdent angesprochen, recht wern ze sint nach dem rehten vnd nach dez landes sitten vnd gewonhait an geward. Vnd dez alles ze offem vrkund so habend wir obgen(anten) abt Erhart vnd gemainer couent dez gotzhus ze Crutzlingen vnsru insigel offenlich gehenkt an disen brieff. Der geben ist in vnserm egenanten gotzhus an sant Laurentzen abent dez martres, do man zalt von Cristus geburt druzehenhundert vnd nuntzig jar, dar nach in dem dritten jar.