Wir^b) Peter Losunger lantfogt in Swaben, Volmar von Wykersheim¹, Wilhelm von Wyle², Hans Selbach von Rafensburg³ vnd Heinrich Ryspel von Wyle L bekennen vnd tun kunt offenlichin mit diesem briue, als des erwirdigen in got vaters vnd herren hern Conrads des heiligen stuls ze Mentze⁴ ertzbischoffs L des heiligen Romischen richs in Dutschen landen ertzcantzelers amptman mit namen her Albrecht von Hirtzshorn⁵ riter burggraue zu Starkenberg⁶ L der edeln herren hern Albrechts grauen zu Werdenberg⁷, hern Hanses grauen zu Sand Gans⁸, hern Thanats grauen zu Tockenburg⁹ vnd der hernachge(schribnen) stedte Wyle, Rotwiler¹⁰, Costentze, Rafensburg, Lindawe¹¹, Vberlingen¹², sand Galle, Czurich vnd ire burgere gute vnd kauffmanschatze uffgehalden hat zu Bensheim¹³ vmb des willen, daz sie sich andere herren hant laszen geleiden in des vorgnanten vnsers herren hern Conrads vnd sines stiffts geleide, vnd als der selbe vnser herre der vorgnanten grauen vnd stedten vns iren burgern ire kauffmanschatze vnd gute gnedeklichin widergeben hat, vnd als die selben grauen vnd stedte ire brieue mit iren anhangenden ingesigeln geben sollent dem vorgnanten vnserm herren hern Conrade vnd sinem stiffte, die stoen sollent von worte zu worte, als hernach geschriben stet: Wir der graue etc. vnd wir die burgermeistere vnd rad der stad .. etc. bekennen offenlich mit diesem^b) fur vns vnser nachkomen vnd die vnsern, als des erwirdigen in got vaters vnd herren hern Conrads ertzbischoffs zu Mentze amptman mit namen her Albrecht vom Hirtzshorn ritter burggraue zu Starkenberg vnser vnd vnsere burgere mit iren kauffmanschatze vnd gute in des vorgnanten vnsers herren des ertzbischoffs slosz zu Bensheim uffgehalden hatte, darumb daz sie sich hant laszen geleiden in des egnanten vnsers herren geleiden ane sine willen vnd wiszen, dieselben vnsere burgere mit iren kauffmanschatz vnd guten der vorgnant vnser herre der ertzbischoff gnediklichin ledig vnd lois gelaszen hat vnd vns vnd yn ire gute gentzlichin widergeben hat, dez wir auch sinen gnaden fliszlichen danken, darumb so vertzihen wir gentzlichin vnd zumal uff alle kosten schaden vnd verluste, der daruff gangen were oder noch daruff geen mochte, wie der were oder gesin mochte von der obgnanten uffhaldunge wegen, fur vns alle vnser burgere vnd die vnsern, vnd wir die vorgnanten grauen vnd kaufflute vertzihen auch fur vns vnd alle vnser erben uff den egnanten vnsern herren den ertzbischoff sine nachkomen vnd den stifft zu Mentze vnd die iren vnd auch uff den vorgnanten hern Albrecht sine erben die sinen vnd alle, die damite zuschicken han oder damite verdacht sin, vnd wollen noch ensollen wir noch nymand von vnsern wegen sie darumb immermer betedingen gefordern zusprechen oder leidigen argwenigen oder schaffen getan werden von nymand in dheine wys âne alle geuerde. Dez ze vrkunde han wir vnser ingesigel an diesen brieff gehangen. Der geben ist noch Christus geburte tusent druhundirt vnd yn dem dru vnd nuntzigesten jare uff den nehsten donrstag nach sand Lucas tag des heiligen ewangelisten. Die selben briue wir die vorgnanten gisele antworten sollen gein Heppenheim¹⁴ zwischen hie vnd den wyhenacht heiligen tagen schirest koment noch gifft dieses briues dem erbern hern Johann von Berstad¹⁵ kelner zu Heppenheim oder dem, der zu zijten des vorgnanten vnsers herren kelner da selbest ist. Vnd wercz, daz wir die briue in der zijt, als vorgeschriben steet, nit antworten, so globen wir mit guten truwen an eides stad vnd mit rechter warheit vnser iglicher mit sin selbes libe, in den nehsten acht tagen noch wynachten nehst komende gein Bensheim in die stad zu komende in rechter gisels wyse vnd giselschafft zu halden vnd nit von dannen zu komen als lange, bis dem vorgnanten vnserm herren dem ertzbischoff oder sinem kelner, als vorgeschriben steet, die briue geantwortet werden ane alle geuerde. Des zu vrkunde han wir die vorgnanten Peter Losunger, Folmar von Wykersheim vnd Wilhelm von Wile vnser iglicher sin eigen ingesigel an diesen brieff gehangen, darunder wir Hans Selbach von Rafensburg vnd Heinrich Rysplin egnant aller vorgeschriben sache bekennen, wann wir vnser ingesigel itzunt nit bij vns han. Datum anno domini millesimo trecentesimo nonagesimo tertio feria quinta post diem beati Luce ewangeliste.