Ich Rudolff Taner zu disen ziten sesshafft vff Honegg¹ tun kunt vnd vergich offenlich mit disem brieff fur mich vnd alle min erben allen, die in sechent oder horend lesen, das ich mit guter vorbetrachtung vnd mit wolbedachtem mut von den wisen wolbescheiden Nicolausen Ruprecht, Vlrichen Rudger vnd Vlrichen ab dem Berg pfleger vnd meister der siechen des spitales ze sant Gallen² den hoff, den man nemmet Honegg, stosset einhalb an das steinin crutz andent an die rechten hoffmarchen vff dem Oberfeld³ vnd der dritten siten an das gut, das man nempt in Geren⁴, das desselben spitals recht fryes eigen ist, mit hus mit hoff mit grund mit grat mit wasen mit zwy mit wunn mit weid mit holtz mit veld mit stagen mit wegen mit gengen mit strassen mit wasser mit wasserflussen mit allen rechten nutzen vnd gewonheiten vnd mit aller zugehord recht vnd redlich enpfangen habe mir vnd allen minen erben frowen als mannen tochtran als knaben vssgenomen eigen luten, die nit gotzhus lut sind, ze ainem staten walderbzinslehen vmb einen staten zins mit semlicher bescheidenheit vnd in den rechten dinge vnd gedinge, das ich vnd all min erben den selben vorgeschriben hoff, den man nemmet Honegg, mit aller zugehord in guten eren vnd vnwustlich haben niessen buwen besetzen vnd entsetzen sond vnd sollent dem egedachten spital da von jerlich je ze sant Martis tag zwey pfund pfenning guter Costentzer muntz ze rechtem jerlichem zins an furzug an allen abgang an alle mindrung vnd an alle wider red geben richten vnd och antwurten ze sant Gallen in der statt an allen desselben spitales schaden an geuerd. Welhes jares aber ich oder min erben ald nachkomen dem egedachten spital den vorgeschriben zins nit richtind vnd gebind gentzlich vnd gar ze dem zil vnd in dem rechten, als vorgeschriben stat, vnd sich das als vil vnd als dik vnd als lang verzug, das zwen zins den dritten erlanget vnd begriffen hettind, so ist vnd sol der selb vorgeschriben hoff, den man nemmet Honegg, mit allen rechten vnd mit allen zugehorden dem vorgeschriben spital zinsuellig vnd och gar vnd gentzlich ledig vnd los verfallen heissen vnd sin vnd dannenhin von aller menklichem jemer ewenklichen vnansprachig vnd vnbekumbert beliben an alle geuerd. Es ward ouch bedinget vnd beredt, were das ich oder min erben den vorgenanten hoff mit deheiner siner zugehord als wustlich hettin denn wir aber solten, so sollen die selben pfleger oder wer die werint dunkti, so si den selben hoff besechint, das ich oder min erben den selben hoff anders gehebt hettind denn wir soltend, so sond die selben botten dry erber man der nechsten nachgepuren darzu nemen vnd kiesen, vnd ouch ich oder min erben sond ouch dry erber man der nechsten nachgeburen dazu nemen vnd kiesen, vnd die selben sechs man sollent den vorgenanten hoff vnd die guter besechen, vnd were das die sechs ein merers nit gemachen kondint noch in ein komen, so mugen si ein sibenden man nemen desselben hoffs nechster nachgebur, welhen si wellen, vnd were das sich der merteil vnder inen erkantin, das ich oder min erben den vorgeschriben hoff wustlicher vnd anders gehebt hettind denn wir soltend, das sollen wir vnuerzogenlich bessern, wie si sich des vnder inen erkennent vnd vns tun heissent, an geuerd. Wer aber das sich der mertel vnder inen des erkantin, dz wir den vorgeschriben hoff in semlichen eren gehebt hettin, das wir vnstraffber sin solten, des sollen wir geniessen vnd vngestraffet beliben. Es ist ouch bedinget vnd berett worden, wer das ich oder min erben deheines jares von vnsern rechten des vorgeschriben hoffs vnd walderbzinslehens gan vnd die verkouffen wolten, so sollend wir die selben vnseri recht des obgedachten spitals pflegern, wer die sind, des ersten veil bieten vnd vor mengklichem ze kouffen geben funf schilling pfenning Costentzer muntz neher vnd bas denn jeman anders, ob si die kouffen wellent, wolten aber si die nit kouffen, so mugen ich vnd min erben die selben vnseri recht des vorgeschriben hoffes vnd walderbzinslehens wol ze kouffen geben, wem wir wellent, die gotzhus lut vnd nit eigen sind, doch dem vorgenempten spital den selben sinen pflegern an ire rechten des vorgenanten hoffes gantzlich vnschedlich, vnd wem ouch ich oder min erben die vorgeschriben vnseri recht ze kouffen gebend, dem sullent es die egeschriben spitals pfleger, wer die sind, an allen furzug vnd an wider red lihen vmb den zins vnd in dem rechten, als an disem brieff die vorgeschriben statt, doch vssgenomen die von den liben eigen vnd nit gotzhus lut sind, denen sollent si nicht gebunden sin ze lihen. Wer aber, das des obgenempten spitals pfleger deheines jares von des spitals rechtung des selben hoffes gan vnd die verkouffen woltin, so sollen si die selben recht des hoffes, als da vorbescheiden ist, mir vnd minen erben des ersten veil bieten vnd vor mengklichem ze kouffen geben funff schilling pfenning neher vnd bas denn jeman anders, ob wir si kouffen wellent, wolten aber wir die nit kouffen, so mugent si den ir recht des vorgenanten hoffes wol ze kouffen geben, wem si wellent, doch mir vnd minen erben an vnsern rechten gantzlich vnschedlich. Vnd ze offem warem vrkund vnd stater sicherheit aller vorgeschribner ding vnd gedinge so han ich vorgenempter Rudolff Taner, won ich eigens insigel nit hatt, mich willenklich gebunden vnder des erbern wolbescheiden Vlrichs Kochlers insigel burger ze sant Gallen, der das selb sin insigel von miner bett wegen fur mich vnd min erben offenlich gehenkt hat an disen brieff, des ich jetzgenempter Vlrich Kochler vergich mir vnd minen erben an schaden. Diser brieff ward geben ze sant Gallen an aller selen tag in dem jar, do man zalt von gotz geburt drutzehen hundert vnd nuntzig jar, dar nach in dem dritten jare.