Wir^a) die nachgen(anten) Johans Geriner burger ze sant Gallen, Adelhait sin êlichi wirtinne vnd Johans Geriner L iro êlicher sun tun kunt vnd veriehent offenlich an disem gegenwurtigen brief allen, die in sehent L lesent oder horent lesen, daz wir allu dru gemainlich mit wolbedahtem mut willeklich frilich L vnd vnbetwungenlich offenlich gesworn habent iekliches besunder ainen gelerten aide ze got vnd ze den hailigen mit vf gehabenen vingern, war daz wir gemainlich ald dehaines vnder vns besunder dehainer lay stoss sach oder ansprachen hettint vff disen huttigen tag, alz dirre brief ist geben, oder hinnenhin iemer gewunnint zu gemainer stat ze sant Gallen oder zu dehainem burger ald burgerinen besunder ze sant Gallen, su sien ietz da selbs burger oder die hie nach burger da selbs ze sant Gallen werdent, alz dik vnd wenne daz beschach, vnd woltin wir danne ie darumb rehtes niht enbern, daz wir danne ie darumb rehtes phlegen vnd reht von in nemen sont vnd wend ze sant Gallen in der stat vor irem geriht vnd niendort anderswa won nach der selben stat reht vnd gewonhait, ez war danne, daz wir da selbs rehtlos gelassen wurdin vnd das och daz kuntlich da wurdi, so ist vns behalten vnd in den aiden vss gelassen, daz wir das reht ie danne, von dem wir rehtlos gelassen sien, anderswa suchen sullen vnd mugen, da es dann billich vnd muglich ist, ân alle geuarde. Vnd des alles ze offem warem vrkunde so han ich Johans Geriner der elter da vorgenant min aigen insigel offenlich gehenkt an disen brief, vnd won wir die obgenanten Adelhait sin êlichi wirtinne vnd Johans iro êlicher sun aigener insigel niht habent, so haben wir erbetten den ersamen Jacob Rupreht, den man nempt Low, stat amman ze sant Gallen¹, daz er sin insigel fur vns gehenkt hat an disen brief, vnder des selben insigel wir vns willeklich gebunden haben, des och ich obgenanter Jacob Rupreht offenlich vergich an disem brief mir vnd allen minen erben gantzlich vnschadlich. Diz beschach vnd ward dirre brief geben ze sant Gallen an dem nahsten donstag vor sant Lucien tag in dem jar, do man von Cristus geburt zalt druzehenhundert jâr, nunzig jâr vnd darnach in dem vierden jâre.