Wir^a) Cuno von gottes gnaden abt des gotzhus ze sant Gallen¹, dz ân alles mittel zugehort dem stul ze Rom, sant L Benedicten ordens in Costenzer bistum tun kund vnd veriehen offenlich mit disem brief allen den, die in ansehent lesent L oder horent lesen, dz fur vns kam ze sant Gallen in der statt, do wir offenlich ze geriht sâssen, vff disen huttigen tag, L als dirre brief ist geben, des wolbeschaidenn Albrehtz Blarrers des eltern burgers ze Costentz kneht Albreht sin gewisser bott mit vollem gewalt an statt vnd in namen des ietzgenamten Albrehtz Blarrers sines herren vnd offnot vor vns mit sinem fursprechen, als wir Cristoffeln Mayer von Altstetten² von desselben Albrehtz Blarres sines herren clag wegen zum andern mâl vff den nahsten fritag vor sant Mathiyas des hailigen zwelffbotten tag fur vns verkunt hettin ze komen zu dem rehten von des zehenden wegen am Kornberg³ in dem Rintal gelegen, der von vns vnd vnserm gotzhus ze sant Gallen lehen wari, also stund vnd wartoti er och vor vns an statt des vorgenanten Albrehtz Blarrers vnd batt vns im mit sinem fursprechen an ainer vrtail ze eruarent, was sines rehten wari. Dz tâten wir vnd ward ertailt mit gemainer vrtail, dz er warten solti, alle die wil vnd wir sassin, vnd kam der vorgenant Cristoffel Mayer die wil nit, dz wir im denn den dritten tag fur vns verkunden soltin vmb die vorgeschribnen sach ze komen zu dem rehten vff den nahsten mittwuchen nach sant Gregorien tag des hailigen bapstes. Do wartet derselb Albreht Albrehtz des Blarrers kneht, als im ertailt was. Do kam der obgedaht Cristoffel Mayer nit. Des batt vns der ietzgenamt Albreht des vorgenanten Albrehtz Blarrers kneht vnd batt, dz wir im dirre wartung ainen brief gabint, den wir im och mit vrtail von des gerihtes wegen vnder vnserm insigel gegeben haben. Dis beschah vnd ward dirre brief geben ze sant Gallen in der statt an dem obgeschribnen nahsten fritag vor sant Mathiyas tag des hailigen zwelffbotten in dem jar, do man zalt von gottes geburt druzehenhundert jar, nuntzig jar vnd darnach in dem funften jare.