Ich^a) Johans Entziswiller vnder vogt ze sant Gallen¹ von des hailigen Romschen richs wegen tun kunt vnd vergich offenlich mit disem L brieue allen, die in ansehent lesent oder horent lesen, das fur mich kament ze sant Gallen in der stat an dem nahsten zinstag vor sant L Johans tag des Toffers ze sunnwendi, do ich von des hailigen Romschen richs wegen an des richs strâsse offenlich ze geriht saz, der L beschaiden Cunrat Huntwiller burger ze sant Gallen an ainem tail vnd Cunrat Keller von Busenhofen² ze dem andern taile, vnd stalten sich da baidenthalb offenlich vor mir vnd dem geriht mit fursprechen, vnd klegt da der vorgenant Cunrat Huntwiller mit sinem fursprechen offenlich vor mir vnd dem geriht zu dem obgenanten Cunrat Keller, der fur ainen schadlichen man von dupstal wegen fur mich an offen geriht gebunden vnd geuangen gefurt vnd geantwurt ward, daz der selb Cunrat Keller, der da ze gegen stund, dem land ain schadlicher man war von dupstal wegen vnd daz er ain samlich schadlicher man war, das man von siner missetat wegen billich vber in rihten solt, wa aber der selb Cunrat Keller der selben klag vnd ansprach vergessen vnd abred sin wolt, das wolt er wisen, alz reht war, vnd batt mich darumb gerihtes hin zu im. Do batt im der obgenant Cunrat Keller eruarn an ainer vrtail, sid daz im du klag an sinen lip giengi, ob man in danne iht billich des ersten erbinden solt, das ward im mit rehter vrtail ertailt, vnd doch also, das man in von des gerihtes wegen in samlicher hut vnd gewarsami haben solt, daz er dem geriht niht abswiff wurd vnd daz dem obgenanten kleger Cunrat Huntwiller daz reht von im wider fur, alz er zu im geklegt hett, vnd do er also nach rehter vrtail enbunden stund, do antwurt der selb Cunrat Keller mit sinem fursprechen vnd sprach, er war vnschuldig, alz der egenant Cunrat Huntwiller zu im geklegt hett, vnd nach des vorgenanten Cunrat Huntwillers klag vnd nach des obgenanten Cunrat Kellers widerred vnd antwurt do fragot ich vorgenanter vogt vrtail vmb vnd ward ertailt mit gemainer vrtail, wa der obgenant Cunrat Huntwiller gesweren moht vnd och swur ainen gelerten aid zu den hailigen, daz der obgenant Cunrat Keller dem land ain schadlich man war von dupstal wegen, alz er geklegt hett, vnd darzu sechs erber vnuersprochen man bi im hetti, die gesweren mohtint vnd och swurint, daz der aid, den er gesworn hett, rain war vnd niht main, daz er des geniessen solt vnd der obgenant Cunrat Keller des engelten solt. Vnd swur och do der vorgenant Cunrat Huntwiller offenlich vor mir an dem geriht willeklich ainen gelerten aide zu den hailigen mit vfgehabenen vingern, alz ertailt waz, das der obgenant Cunrat Keller dem land ain schadlich man war von dupstal wegen. Dar zu swurent och sechs erber vnuersprochen man iekliche besunder ainen gelerten aid ze den hailigen mit vf gehabenen vingern, daz der aid, den der vorgenant Cunrat Huntwiller gesworen hett, rain war vnd niht main. Darnach fragot ich aber vrtail vmb, waz nv reht war, vnd ward ertailt mit gemainer vrtail, daz ich den obgenanten Cunrat Keller von der misstat wegen dem nachrihter beuelhen vnd antwurten solt, vnd daz im der sin hende hinder sich binden vnd sinu ogen verbinden solt vnd in dem ertrich entfromden vnd dem luft beuelhen vnd in an ainen galgen henken solt. Vnd do daz beschach vnd ertailt ward, do batt mich der vorgenant kleger Cunrat Huntwiller mit sinem fursprechen eruarn an ainer vrtail, ob daz war, daz in ald die sechs erber man sin gezugen ieman vechti oder beschalkoti von der klag vnd von des selben Cunrat Kellers todes wegen oder ieman andre, die mit raten oder mit getaten darzu geraten oder gehulffen hettint, waz dann darumb reht war. Daz ich och tet vnd ward nach miner frage ertailt mit gemainer vrtail, beschach daz ieman, wer die warint ald wie su genant warint, den vorgenanten Cunrat Huntwiller oder sin gezugen oder ieman andre, wer die warint, die mit raten oder mit getaten schuld hettint an des obgenanten Cunrat Kellers vanknust vnd tode vnd darzu gerâten oder gehulffen hettin, vechtint oder schadgotin an lib oder an gut ald die sach afertint mit worten oder mit werken, wa man den oder die, die daz tatint, ergriffi, daz die in den selben schulden stan vnd vertailt lut sin soltint, alz der obgenant Cunrat Keller stund vnd waz, do er dem nachrihter mit vrtail geantwurt vnd beuolhen ward. Vnd des alles ze offem warem vrkunde so han ich Johans Entziswiller vnder vogt da vorgenant von des gerihtes vnd des hailigen richs wegen min insigel offenlich gehenkt an disen brief, won ez och mit gemainer vrtail ertailt ward, daz ich ez tun solt. Diz beschach vnd ward dirre brief geben ze sant Gallen an dem vorgeschribenn zinstag in dem jar, do man von Cristus geburt zalt druzehenhundert jar, nunzig jâr vnd darnach in dem funften jâre.