Wir^a) Cun von gottes gnaden abt des gotzhus ze sant Gallen¹, daz an alles mittel zugeLhort dem stul ze Rom, sant Benedicten ordens in Costentzer bystum veriehen vnd tunt L kunt allermenglichem mit disem brief, daz fur vns kam ze sant Gallen in vnserm ietzgenanten L gotzhus hut dis tags, alz dirr brief geben ist, der from vest Hainrich von Hertenstain vnd offnot vor vns vnd sprach, daz frow Margrecht Truhsassin von Diessenhouen wilent her Bruns salgen von Hertenstain ritters elichi wirtenn sin liebi muter bi im an vnser hand ledklich vff gesendt hetti ain gut ze dem dorf Rutlingen gelegen, daz ietz Vtz der Haller buwet vnd daz vormalz der Waltz von Husen gebuwen hat, vnd ain gut ze demselben dorf gelegen, daz wilent der Spath gebuwen hat vnd es dar nach die Ostainin gebuwen hat, mit allen rechten nutzen gewonhaiten vnd zugehoden^b), die ir lehen von vns vnd von vnserm gotzhus warent, vnd hetti vns dieselb sin muter ernstlich gehaissen bitten, daz wir dieselben zwai guter von ir vffnemen vnd die ze lehen lihen woltent frow Nesen von Hornstain Johansen von Bernhusen elichen wirtennen. Vnd nach der offnung vnd vergicht do gab vns do ze stett der obgenant Hainrich von Hertenstain an der obgenanten siner muter statt die obgenanten zwai guter ledklich vff an vnser hand vnd batt vns von derselben siner muter wegen ernstlich, daz wir dieselben zwai guter baidi ze lehen lihen woltent der obgenanten frow Nesen von Hornstain Johansen von Bernhusen elichen frowen. Dar vmb erhorten wir sin ernstlich bett, die er von siner muter wegen dar vmb an vns lait, vnd nament dieselben guter von im vff an vnser hand vnd lihent vnd santent do ze stett der obgenanten frow Nesen von Hornstain Johansen von Bernhusen elichen frowen vnd lihent vnd sendent ir och redlich vnd recht mit disem brief die obgenanten zwai guter ze dem dorf Rutlingen gelegen mit allen rechten nutzen gewonhaiten vnd zugehorden ze lehen an geuard. Wir haben och derselben frow Nesen von Hornstain die gnad getan, daz si dieselben zwai guter mit aller zugehord an allermenglichs sumen in lehens wis haben vnd niessen sol in glicher wis vnd rechten, alz ob si ain man war, an geuard. Vnd des ze warem offem vrkund so haben wir Cun abt des gotzhus ze sant Gallen da obgenant vnser insigel offenlich gehenkt an disen brief. Der geben ist ze sant Gallen in vnserm obgenanten gotzhus an sant Margrethen der hailgen magt tag, do man zalt von Cristi geburt druzehenhundert vnd nuntzig iar, darnach in dem funften jar.