Allen den, die disen brief ansehent oder horent lesen, kund ich Wernli Giel¹ vnd vergich offenlich mit disem brief, daz fur L mich kam vff den tag, alz dirr brief geben ist, der erber man Johans Viol burger ze Wil² vnd offnot vor mir vnd sprach, daz L er von mir ze lehen hetti ainen akker vff Wilberg³ zwischen den Bulen⁴ gelegen, der ainhalb anwandet vff Herman Kramers L akker vnd anderthalb vf Hugen von Rossruti⁵ akker, vnd denselben akker mit allen rechten vnd mit aller siner zugehord hetti er ains ewigen vngeuarlichen koffes fur sich vnd alle sin erben ze koffent geben dem erwirdigen fursten minem gnadigen herren abt Cunen von gottes gnaden des gotzhus ze sant Gallen⁶ vnd sinen nachkomen zu desselben gotzhus handen. Vnd batt mich derselb Johans Viol ernstlich, daz ich denselben akker mit aller zugehord dem ietzgenanten gotzhus ze sant Gallen aignen vnd mich miner lehenschaft manschaft aigenschaft vnd aller der rechtung, so ich dar zu hetti, verzihen wolti. Dar vmb erhort ich sin ernstlich bett vnd verzech vnd entwert mich do ze stett ledklich vnd frilich wilklich vnd wolbedaht vnd verzich vnd entwer mich och redlich vnd recht mit disem brief fur mich vnd fur alle min erben gegen dem obgenanten minem gnadigen herren abt Cunen des gotzhus ze sant Gallen vnd gegen allen sinen nachkomen zu desselben gotzhus handen aller manschaft aller lehenschaft aller aigenschaft aller rechtung vordrung vnd ansprach, so ich oder min erben zu dem obgenanten akker mit aller zugehord ie gehatten oder hie nach iemermer gewinnen mohtent von dehainerlay sach wegen, so ieman erdenken kan, an geuard, also daz si denselben akker mit aller zugehord nu hinnan hin iemermer fur recht ledig aigen an min vnd aller miner erben vnd an allermenglichs von vnsern wegen sumen vnd ansprach haben vnd niessen sont vnd mugent vngeuarlich. Des ze staten waren sicherhait so han ich min insigel fur mich vnd min erben offenlich gehenkt an disen brief. Der geben ist an sant Jacobs aubent, do man zalt von Cristus geburt druzehenhundert vnd nuntzig iar, dar nach in dem funften jar.