Wir^a) Chun von gottes gnâden abt des gotzhus ze sant Gallen¹, daz ân alles mittel zugehort dem stul ze Rôme, tun kunt vnd veriehent offenlich mit disem brieue allen, die in ansehent L lesent oder horent lesen, daz fur vns kam ze sant Gallen in vnserm hof an dem tag, alz dirre brief geben ist, der erber Johans Wildrich vnser schriber vnd offnot da vor L vns offenlich vnd sprach, wie daz im Jacob Honberg der smit burger ze Lindow² den zehenden an win vnd an korn ze Hengnow³ mit wolbedahtem mut mit allen rehten L vnd mit aller zugehorde reht vnd redlich zu sinen handen vf geben hetti, also mit der beschaidenhait, daz der selb Johans Wildrich vnser schriber den vorgeschribenn zehenden ze Hengnow mit allen rehten nutzen vnd gewonhaiten vnd mit aller zugehorde an vnser hand vf geben vnd vns bitten solt an dez vorgenanten Jacob Honbergs stat, daz wir den vorgeschribenn zehenden ze Hengnow mit allen rehten vnd zugehorden von im vf namint vnd in lihent ze lehen Haintzen Vatterlin burger ze Lindow vnd Nycolausen Vten burger ze Arbon⁴ baiden gemainlich vnd vnuerschaidenlich ze rehten lehen, won och der selb Jacob Honberg von ernstlicher sach zu disen ziten selber fur vns nith komen moht, also war och der selb Johans Wildrich vnser schriber fur vns komen, vnd gab och do ze stett der ietzgenant Johans Wildrich vnser schriber den vorgeschribenn zehenden ze Hengnow mit allen rehten nutzen vnd gewonhaiten vnd mit aller zugehorden an dez vorgenanten Jacob Honbergs stat vf an vnser hand vnd batt vns, den selben zehenden ze Hengnow mit allen rehten vnd zugehorden ze lihenn den obgenanten Haintzen Vatterlin vnd Nycolausen Vten baiden gemainlich vnd vnuerschaidenlich ze rehtem lehen. Do erhorten wir sin bett, won si vns redlich dunkt, vnd lihent den vorgeschribenn zehenden ze Hengnow mit allen rehten vnd zugehorden vnd lihent in mit disem brief den obgenanten Haintzen Vatterlin vnd Nycolausen Vten baiden gemainlich vnd vnuerschaidenlich ze rehtem lehen, doch vns vnd allen vnseren nochkomen vnd dem vorgeschribenn gotzhus ze sant Gallen an allen vnseren rehten vnd gewonhaiten gantzlichen vnschadlich. Vnd ist diz allen ^b) beschehen vnd vollefurt reht vnd redlich mit allen den worten werken vnd getaten, so nach gewonhait vnd nach reht darzu gehorten ald horen soltent vnd notdurftig warent vnd alz es kraft vnd maht sol vnd mag han ietz vnd hie nach. Vnd des alles ze offem warem vrkunde vnd stater sicherhait aller der vorgeschribenen dinge vnd vergicht so haben wir abt Chun abt des gotzhus da vorgenant vnser insigel offenlich gehenkt an disen brief. Darnach veriehent wir die obgenanten Jacob Honberg vnd Johans Wildrich der schriber ain gantz warhait aller der dinge, so der erwirdig furst abt Chun vnser gnadiger herre da vor an disem brief von vns veriehen hat, vnd ze besser sicherhait aller vorgeschribenn dinge so habent wir die ietzgenanten Jacob Honberg vnd Johans Wildrich och vnseru aigenu insigel offenlich gehenkt an disen brief, doch mir obgenanten Johansen Wildrich vnd allen minen erben gantzlich vnschadlich. Diz beschach vnd ward dirre brief geben ze sant Gallen an dem nahsten fritag vor sant Thomas tag dez hailigen zwelfbotten vor wihennahten in dem jar, do man von Cristus geburt zalt druzehenhundert jar, nunzig jâr vnd darnach in dem funften jare.