Allen^a) den, die disen brief ansehent lesent oder horent lesen, kund ich Hainrich Schulmaister Hugen Schulmaisters salgen êlicher sun L burger ze sant Gallen vnd vergich offenlich mit disem brieue fur mich fur alle min erben vnd nachkomen, das ich mit wolbedahLtem^b) vnd guter vorbetrahtung mit miner frunde vnd mit ander erber lut rat den zehenden ze Nidren Arnang¹ ab allen L vnd von allen den gutern, die da selbs ze Nidren Arnang gelegen sint, mit allen rehten nutzzen vnd gewonhaiten vnd mit allem dem, so von reht ald von gewonhait darzu ald darin gehort, ez sie genemptz oder vngenemptz gesuchtz oder vngesuchtz wissentz oder vnwissentz, alz ich den selben zehenden ze Nidren Arnang vntz her vff disen huttigen tag, alz dirre brief ist geben, inne gehebt vnd genossen han, redlich vnd reht aines staten ewigen koffes verkoft vnd ze koffenn geben han den wolbeschaidnen Hainrich Anderlis dem smit burger ze sant Gallen, Vlrichen, Johansen, Elzbethen, Annen vnd Vrsullen sinen êlichen kinden allen sechsen gemainlich vnd vnuerschaidenlich vnd iren erben, ob su enwarint, vmb hundert phunt vnd vmb funfzehen phunt phenning guter Costentzer munse, dero ich gantzlich vnd gar von inen gewert bin vnd enphangen han vnd an minen nutz bewendet, der selb zehend ze Nidren Arnang min reht lehen was von dem erwirdigen gotzhus ze sant Gallen, dannen ich inen och den selben zehenden mit allen rehten nutzzen vnd gewonhaiten vnd mit aller zugehorde reht vnd redlich gevertgot vnd zu iren handen braht han, alz reht sitte vnd gewonlich waz vnd alz es kraft vnd maht sol vnd mag han, vnd darumb so han ich willeklich verzigen vnd verzich mich mit disem brief gantzlich vnd gar fur mich vnd fur alle min erben des vorgeschribenn zehenden ze Nidren Arnang mit aller zugehorde aller aigenschaft aller lehenschaft aller kuntschaft alles vszugs aller gewer lut vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so ich oder min erben, ob ich enbin, an dem zu dem vnd von des vorgeschribenn zehenden wegen ie gehebt habent ald hie nach iemer gehaben oder gewinnen mohtint, vnd daz ich noch min erben noch nieman andre an vnser stat noch von vnsern wegen die obgenanten Hainrich Anderlin, Vlrichen, Johansen, Elzbethen, Annen vnd Vrsullen sinu êlichen kint noch dehain iro erben noch nachkomen darumb niemer sullent noch wellent ansprechen vf triben bekumberren bekrenken noch in kain wis beswaren weder mit gaistlichem noch weltlichem geriht noch ân geriht noch mit enkainer lay ander sache ân alle geuarde. Ich han och gelobt mit miner truwe vnd loben mit disem brieue fur mich vnd fur alle min erben, des vorgeschribenn zehenden mit allen rehten vnd zugehorden vnd des koffes reht wer ze sinne, vnd han inen daruber zu mir ze merer sicherhait ze rehtem wern geben vnd gesetzt den beschaidenn Gerwigen Payger minen ohain och burger ze sant Gallen, der hat inen mit mir gelobt mit siner truwe, des vorgeschribenn zehenden mit aller zugehorde vnd des koffes reht wer ze sinne nach des landes reht vnd och die obgenanten Hainrich Anderlin, Vlrichen, Johansen, Elzbethun, Annen vnd Vrsullen sinu kind vnd iro erben darumb ze versprechenn vnd ze verstanne an allen stetten gen aller manglichem ân allen iren schaden, wenn wa vnd wie dik su des bedurffent ald darumb von ieman angesprochen geschadgot oder vf getriben werdent mit dem rehten inwendig dem zil, als wir des koffes von reht wer sin sont. Ich han och gelobt fur mich vnd min erben, dem obgenanten wern sinen schaden gantzlich ab ze tunne, in den er kumpt von der vorgeschribenn werschaft vnd gelubt wegen. Vnd des alles ze offem warem vrkunde vnd stater sicherhait aller der vorgeschribenn dinge vnd vergicht so han ich Hainrich Schulmaister da vorgenant fur mich vnd fur alle min erben min aigen insigel offenlich gehenkt an disen brief. Darnach vergich ich der obgenant wer Gerwig Payger ain gantz warhait aller der dinge, so von mir an disem brief da vorgeschriben stant, vnd ze besser sicherhait der selben dinge so han ich och min aigen insigel offenlich gehenkt an disen brief. Der geben ist ze sant Gallen an dem nahsten mantag vor dem zwelften tag nach wihennahten in dem jar, do man von Cristus geburt zalt druzehenhundert jâr, nunzig jâr vnd darnach in dem sechsten jâre.