Wir Chun von gottes gnaden abbt des gotzhuß zu sant Gallen sant Benedicten ordens in Costentzer bistum, das one alles mittel zu gehort dem stul ze Rom, verjehent vnd tund kunt allermenglichem mit disem brieff, das fur vns kam ze Wil¹ in vnsers gotzhuß statt vff hut disen tag, als dirre brieff geben ist, der from Johansconrat von Bodmen wilent des alten herr Hansen saligen von Bodmen ritters sasßhafft ze Meckingen elicher sun, vnd batt vns ernstlich, das wir im die veste Meckingen, die lehen ist von vnserm gotzhuß, vnd alles das, so an die selbe veste Meckingen vnd dartzu gehort, das von vnserm obgenanten gotzhuß lehen were vnd der obgenant sin vatter salig von vns vnd vnserm gotzhuß ze lehen gehebt hette, lihen wolten ze lehen, doch in sollicher wise maß vnd in dem geding, das dasselb lihen vnd emphahen gentzlich vnschadlich sin vnd bliben solte dem gemechte, das sin lieber bruder salig herr Johanß von Bodmen ritter vnd der obgenant sin vatter salig baid zu den ziten sesßhafft zu Meckingen vnd ouch er mit inen vormals vor vns von der obgenanten veste Meckingen mit ir zugehord wegen getan hetten gegen sinen lieben vettern herr Johansen von Bodmen ritter gesessen ze Bodmen vnd gegen herr Johansen von Bodmen ritter desselben sines vettern sun vnd gegen iren elichen liberben, die knaben werend, wan besunder dasselb gemacht gentzlich bestaun vnd beliben solte nach des gemachtz brieff sag, der vormals darumb gegeben vnd versigelt were, ane geuerd. Darumb herhorten^a) wir desselben herr Hansconratz von Bodmen ernstlich bett, wan sy vns redlich ducht, vnd lihen im do zestett wisßentlich vnd wolbedacht vnd lihen im ouch redlich vnd recht mit disem brieff die obgenant veste Meckingen vnd alles das, so doran vnd dartzu gehort, das von vnserm obgenanten gotzhuß lehen ist, ze lehen ane geuerd, doch also, das dises lihen vnd emphahen vnd diser gegenwurtig brieff dem obgedachten gemacht gentzlich vnschadlich vnd vnuergriffenlich sin sol vnd das das selb gemacht beston vnd beliben sol by siner crafft nach des obgedachten gemachtz brieff sag, der vormals dorumb geben ist, ane geuerd. Vnd des alles zu warem offem vrkund so haben wir abbt Chun des gotzhuß zu sant Gallen do obgenant vnser insigel offenlich gehenckt an disen brieff. Darnach vergich ich obgenanter Johansconrat von Bodmen ain gantz warhait aller vorgeschribnen dingen, so der hochwirdig furst abbt Chun des gotzhuß zu sant Gallen hieuor von mir veriechen hat an disem brieff, vnd das ich die obgenant veste Meckingen mit ir zugehorde von im emphangen han, dem obgedachten gemacht gentzlich vnschadlich vnd vnuergriffenlich nach des obdachten gemacht brieffs sag, one geuerde. Vnd des zu merer sicherhait so han ich ouch min insigel offenlich gehenckt an disen brieff. Der gegeben ist zu Wil an dem nechsten dornstag vor vnser lieben frowen tag zu der liechtmisß, do man zalt von Crists geburt drutzehenhundert vnd nuntzig, dornach in dem sechsten jare.