Wir^a) Cun von gottes gnaden abt des gotzhus ze sant Gallen¹, das an alles mittel zu gehort dem stul ze Rom, veriehent mit vrkund diz brieues, daz L fur vns kam ze Wil² in vnsers vorgenanten gotzhus statt der ffrom vest ritter herr Vlrich von Amptz³ der elter vnd offnat vor vns vnd sprach, wie das er von dem erLwirdigen herren Hartman von gottes gnaden bischoff ze Kur⁴ vnd von dem edeln wolerbornen herren graff Hainrichen von Werdenberg von Sangans⁵ gebrudern L sinen gnadigen herren gekoffet hetti das burgstal wingarten vnd guter ze Rebstain⁶ in dem Rintal gelegen mit gerihten twingen vnd bannen vnd mit aller zu gehord, als si daz inne gehebt vnd genossen hand, das alles iro lehen wari von vns vnd vnserm vorgenanten gotzhus ze sant Gallen, vnd zogt vns och darvmb von den obgenanten herren ainen vff send brief, der ze end der selben geschrifft mit der selben herren vff gedrukten insigeln besigelt was vnd von wort ze wort also geschriben stund: Es folgt der Text von Nr.6760. Darnach batt vns der selb herr Vlrich, dz wir im das vorgenant burgstal wingarten vnd guter ze Rebstain gelegen mit gerihten twingen vnd bannen vnd mit allen rehten vnd zu gehorden, als si das inne gehebt vnd genossen hand, lihint ze rehtem lehen. Darvmb erhortan wir do iro bett vnd lihent dem egenanten herr Vlrichen von Amptz dem eltern vnd rittern das vorgenant burgstal wingarten vnd guter ze Rebstain gelegen mit gerihten twingen vnd bannen da selbund vnd mit aller zu gehord, als dz die selben herren inne gehebt vnd genossen hand, ze rehtem lehen vnd lihent im mit disem brief, was wir im daran durch reht lihen sullent, vns vnd vnserm vorgenanten gotzhus an zehenden vnd andren rehtungan gantzlich vnschadlich. Vnd des ze warem vrkund haben wir obgenanter abt Cun vnser insigel offenlich gehenkt an disen brief. Dârnach veriehent wir obgenanten Martman^b) von gottes gnaden bischoff ze Kur vnd graff Hainrich von Werdenberg von Sangans gebruder ain gantz warhait alles des, so von vns an disem brief verschriben stat, vnd ze merer sicherhait der selben vergiht haben wir och vnsri aignen insigel offenlich gehenkt an disen brief. Der geben ist am zinstag vor vnser ffrowen tag ze der liehtmess in dem jar, do man zalt von Cristi geburt tusent^c) druhundert nuntzig vnd sehs jar.