Allen^a) den, die disen brief ansehent lesent oder horrent lesen, tun ich Beringer Schulmaister burger ze sant Gallen L kund vnd vergich offenlich mit disem brief fur mich vnd all min erben, das mir der wis wolbeschaiden Niggel RuLpreht stattamman ze sant Gallen¹ von wegen vnd an statt des hohwirdigen fursten Cunen von gottes gnaden abt L des gotzhus ze sant Gallen² mines gnadigen herren geben vnd gewert hat hundert pfund vnd zwaintzig pfund pfennig alles guter vnd genamer Costentzer muns an der geltschuld, die mir der from vest ritter herr Eglolff von Roschach³ schuldig ist, als min brief wisent vnd sagent, die ich darvmb von im versigelt inne han. Item aber hat mir der beschaiden Vlrich Flîsknab burger ze Wil⁴ von wegen vnd an statt des vorgenanten mines herren abt Cun geben vnd an der egenanten geltschuld, so mir der egenempt herr Eglolf vnd sin erben schuldig sind, gewerot vier vnd zwainzig pfund pfenning alles guter Costentzer muns. Vnd darvmb so lass vnd sagen ich fur mich vnd all min erben den vorgenanten minen gnadigen herren abt Cun sin nahkomen vnd das vorgenant gotzhus ze sant Gallen vnd och den egenanten herr Eglolfen von Roschach vnd sin erben vmb die vorgenanten zwainzig vnd hundert pfund pfenning vnd vmb die vier vnd zwaintzig pfund pfenning alles guter vnd genamer Costentzer muns gantzlich vnd gar ledig los vnd quitt mit disem brief. Vnd ze warem vrkund vnd gantzer sicherhait alles des, so an disem brief verschriben stat, han ich obgenanter Beringer Schulmaister min aigen insigel fur mich vnd all min erben offenlich gehenkt an disen brief. Geben am samstag nah sant Vallentinus tag in dem jar, do man zalt von Cristi geburt dusent druhundert nuntzig vnd sehs jar.