Allen^a) den, die disen brief ansehent oder horent lesen, kund ich Heinrich Turbis genant L Molitor vogt der statt ze Rapreschwil¹ vnd vergich offenlich mit disem brief, daz fur L mich kamenn fur offenn gericht junkherr Hans von Wilberg² ze einem teil vnd Vlrich L Cunili von Hurden³ ze dem andern teil, vnd offnot der vorgenant von Wilberg mit sinem fursprechen, daz er fur sich vnd sin erben dem obgenanten Vlrich Cunilin vnd sinen erben recht vnd redlich zekoffenn geben habe fur ledig eigen die inssel vnd daz gutli, daz man nemmet in der Lutzlenow⁴, mit aller zugehorde, gelegen in dem sê zwuschen Vffnow⁵ vnd der statt ze Rapreschwil, vmb funf vnd drissig pfunt pfening genger vnd gewonlicher Zuricher muntz, desselben geltz er och gantzlich von dem egenanten Vlrich Cunilin gewert vnd bezalt war, vnd habe daz in sinen guten nutz bewendet, als er vor gericht veriach, vnd nach diser offnung fertgot der selb junkherr Hans von Wilberg dem obgenanten Vlrich Cunilin daz vorgeschriben gutli mit allen rechten vnd zu gehorden vnd entzech sich daran aller vordrung vnd ansprach, so er oder sin erben mit geischlichen oder weltlichen gerichten ald an gericht iemmer darzu gehaben mohtin,vnd lopt ôch darzu mit guten truwen fur sich vnd sin erben, des selben gutlis mit aller zugehord wêr vnd troster ze sin fur ledig eigen, vntz daz den vorgenanten Vlrich Cunilin oder sin erben ein gewêr dabi schirmet nach des landes recht, an geuerde. Vnd beschach dis alles also an des gerichtz stab mit allen den worten vnd werchen, so darzu hort vnd notdurfftig waz vnd als gericht vnd vrteil gab, daz es billich krafft vnd macht hett nu vnd hienach. Vnd des alles ze warem vrkund hân ich der obgenant vogt min eigen insigel von des gerichtz vnd von beider teil bett wegen offenlich gehenkt an disen brief, darzu hân ich der obgenant Hans von Wilberg min eigen insigel ze merer sicherheit fur mich vnd min erben offenlich gehenkt an disen brief. Der geben ist an dem nachsten fritag nach sant Barnabas tag des heilgen zwelffbotten, do man zalt von Crists geburte drutzehen hundert vnd nuntzig jar, darnach in dem sechsten jare. Hie bi warenn Johans Honburger, Hans Grunower des râtes ze Rapreschwil, Heinrich Hadlikon, Rudolff Schnewli vnd ander erberer lut.