Allen^a) den, die disen brief ansehent oder horent lesen, kund ich Rudi von Rosenberg her Rudolfs von Rosenberg von Zukkenried¹ elicher sun vnd vergich offenlich L mit disem brief fur mich vnd fur alle min erben, alz mir der erwirdig gaistlich herr abt Rudolf von gottes verhengd des gotzhus ze sant Johans² in dem L Turtal fur sich vnd sin nachkomen vmb vnd fur vier pfund haller in pfandes wis versetzt hat die erbern kneht Hansen, Cunin, Eberlin vnd Vlin die L Lochnower Cuni Lochnowers sun von Geftnow³, daz er mir die versetzt hat mit solicher gedingd beschaidenhait vnd in dem rechten, daz ich dieselben kneht alle vier in pfandes wis inne haben vnd die vngeuarlichen schirmen sol alz ander pfandlut, die min pfand sint, alle die wil vnd alz lang dieselben lut von mir oder von minen erben nit geledgot vnd gelost sint mit vier pfund hallern, alz hie nach beschaiden ist, vnd daz derselben vier Lochnower ieklicher besunder mir oder minen erben iekliches iares besunder, alle die wil vnd alz lang si von mir oder von minen erben nit gelost sint, geben sol an furzug vnd widerred funf schilling pfen(ning) guter vnd genamer Costentzer muns ie zwen haller fur ainen pfen(ning), derselben funf schilling pfen(ning) mich oder min erben och iarklich von iro ieklichem benugen sol fur alle dienst vnd fur alle ding, vnd sollent inen dar vber nutz mer an muten an geuard. Vnd sont aber dieselben Lochnower vnd ir erben da zwischan allweg nutz dester minder gebunden sin, dem obgenanten abt Rudolfen sinen nachkomen vnd dem gotzhus ze sant Johans ze dienent vnd mit allen dingen ze wartent vnd gehorsam ze sint, vnd sol inan och disi versatzung enweder bi der obgenanten Lochnower leben noch nach irem tod an dehainer erbschaft vallen gelassen noch diensten noch an dehainen andren dingen gegen nieman kainen schaden noch ierrung bringen noch beren in dehain wis noch weg in glicher wis, alz ob si der obgenant abt Rudolf mir nit versetzt hetti, an geuard. Vnd wenn oder welhes iares och derselb abt Rudolf oder sin nachkomen oder die obgenanten Lochnower oder ir erben oder ieman andra von iro oder von des gotzhus ze sant Johann wegen mich oder min erben dar vmb ermanent vnd vns sament vnd mit ainander werent vnd bezalent vier pfund guter vnd genamer haller, so sollen wir vns dero an widerred lassen bezaln vnd sollent dann dar vmb an stett dem obgenanten abt Rudolfen oder sinen nachkomen oder, wer dann dieselben losung von des gotzhus ze sant Johans wegen von mir oder minen erben tun wil, die obgenanten Lochnower mit aller zugehord wider ze losent geben vnd inen die an alle widerred vnd an furzug ledig vnd los lassen vnd den pfandbrief, den ich darvmb inne han, zu des obgenanten abt Rudolfs oder zu siner nachkomen handen vsshin geben vnd antwurten an alle widerred an geuard. Es ist och in diser versatzung zwischan dem obgenanten abt Rudolfen vnd den obgenanten Lochnowern mit namen bedingot vnd beredt, wenn derselb abt Rudolf oder sin nachkomen die obgenanten Lochnower dar vmb ermanent, daz si oder ir erben, ob si enwarent, sich dann nach derselben manung vn­uer­zo­gen­lich inwendig dem nahsten manot mit den obgeschribnen vier pfund hallern von mir oder von minen erben wider an daz obgenant gotzhus ze sant Johans ledgen vnd losen sont an alle widerred gantzlich an allen schaden des obgenanten abt Rudolfs siner nachkomen vnd des gotzhus ze sant Johans an geuard. Vnd des alles ze warem offem vrkund so han ich obgenanter Rudi von Rosenberg min insigel fur mich vnd min erben offenlich gehenkt an disen brief. Der geben ist ze Zukkenried vff der burg an dem nahsten samstag vor sant Johans tag des Toffers ze sunnwendi, do man zalt von Cristi geburt druzehenhundert vnd nuntzig iar, dar nach in dem sehsten jar.