Wir^a) diz nâchgenempten Agnês von Wartensê¹ Johansen von Stainach² saligen wilunt êlichi husfrow, Bilgri Rûssinger burger ze Râpraswille³ vnd Elzbeth⁴ sin êlichi husfrow der L ietzgenempten Agnêsen von Wartensê swoster tugint kûnt vnd veriehent offenlich mit disem brieue fur vns vnd fur alle vnser êrben allen, die in sehent lesent oder L horent lesen, daz wir allu ainhelleklich mit wolbedâchtem mute vnd mit guter vorbetrachtûng von vnser rechter note wegen recht vnd rêdlich verkofft habent L vnsru recht vnd vnsern tail der vogtye ze Olmisperg⁵ mit den funf schilling phenning Costenzer munse jarlichs vnd êwigs geltes vnd zins, die vns ze vnserm tail jarlich dâ von giengent vnd vntzher dâ von gegangen vnd worden sint, vnd och mit vallen vnd mit gelasse vnd mit allen den rechten vnd zugehorden, so von recht ald von gewonhait dârzu vnd dâr in gehorent vnd vntzher gehort hant vnd alz wir es vntz her gehebt vnd genossen hant vnd aines staten êwigen koffes recht vnd rêdlich ze koffenn geben hant den fromen wisen Bernharten Blârer von Wartensê⁶, frow Katherinen⁷ siner êlichen husfrowen baiden ze ainer rechter gemainde vnd iro êrben vmb vier phûnt phenning ie zwen gut geng haller fur ainen Costenzer phenning, die wir von inen dâr vmb enphangen hant vnd ir gantzlich gewert sint worden vnd an vnsern offenn nûtz bewêndet sint, die selb vogtye vormâls dez obgenanten Bernhartz Blârers halbi gewesen ist, vnd daz egenant halbtail vnser lêhen gewesen ist von dem êrwirdigen gotzhus ze sant Gallen, dannen wir och den selben vorgenempten Bernharten Blârer vnd Katherinen siner êlichen husfrowen baiden ze ainer rechten rêdlicher gemainde den vorgeschribenn vnsern tail vnd allu vnsru recht der obgedâchten vogtye ze Olmisperg mit vallen vnd mit gelasse vnd mit allen den rechten vnd zugehorden, so von recht ald von gewonhait dârzu vnd dâr in gehorent vnd vntzher gehort hant vnd alz wir es vntz vff disen huttigen tag, alz dirre^b) ist geben, gehebt vnd genossen hant, von vnsern handen zu iro handen vfgeben vnd geuêrtigot hant, wie recht vnd gewonhait waz, daz es kraft vnd maht sol vnd mag han ietz vnd hie nâch, vnd dâr vmb so haben wir vns allu frylich vnd willeklich entzigen von vnsern vnd vss vnsern handen in der vnd zu der obgenanten Bernhartz Blârers vnd frow Katherinen siner êlichen husfrowen handen vnd verzihent vns mit disem brieue gantzlich vnd gar aller aigenschaft aller lehenschaft aller kûntschaft aller manschaft aller rechtûng aller gewêr lute vnd brieuen aller recht vordrûngen vnd ansprâchen gaistlichs vnd weltlichs gerichtz, so wir ald vnser êrben an der vnd zu der vorgeschribenn vogtye zu dem tail, der vnser gewesen ist, ald zu dehainen rechten, die wir dârzu ald dâr an ie gehebt hant ald hie nâch iemer mê gehaben oder gewunnen mohtint. Wir haben och allu vnuerschaidenlich gelobt bi guten truwen vnd loben mit disem brieue fur vns^c) vnd fur alle vnser erben, der vorgeschribenn halben vogtye vnd aller der rechten, so wir dâr inne dârzu vnd dâr an gehebt hant, wie du genempt sint, mit allen zugehorden vnd dez koffes recht wern ze sinne nâch dez landes recht vnd die obgenanten Bernharten Blârer, frow Katherinen sin êlichen husfrowen vnd iro êrben nâch dem rechten dâr vmb ze versprechenn vnd ze verstanne vff gaistlichem vnd vff weltlichem gerichte vnd an allen stetten gen aller manglichem ân allen iro schaden, wenn wo vnd wie dik su dez nâch dem rechten notdurftig sint oder dâr vmb angesprochen geschadgot genotigot oder vfgetriben werdent, ân alle gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so haben wir vorgenempten Agnes von Wartensê, Bilgri Russinger vnd Elzbeth von Wartensê sin êlichi husfrow allu dru vnsru insigel fur vns vnd vnser êrben offenlich an disen brief gehenket. Der geben wart in dem jâre, do von Cristi geburt wârent druzehenhûndert vnd nunzig jâr vnd dâr nâch in dem sechsten jâr, an sant Felix tag im hêrbst.