Ich^a) Gebhart Echinger stattamman ze Costentz¹ tun kund vnd vergich des offenlich mit disem brieff allen, die in an sehent oder horent lesen, das ich offenlich ze gericht sass ze Costentz an offner lantstrass des riches an dem tag, alz dirre brieff geben ist. Do L kam fur mich und fur offen gericht du edell wolerborn frow fro Clement graffin geborn von Toggenburg² wilent her Hainrichs salgen von Hewen³ elichu husfrow vnd offnott vor mir vnd vor offem gericht, das si ains rechten vnd redlichen koffes in L ain komen sie mit den fromen wolbeschaidnen Cunratten von Hoff Gros Hansen salgen sun von Hoff vnd mit fro Annen siner elichen frowen burger ze Costentz, also si hab an barem gut von inen baiden enpfangen zway tusent pfunt vier hundert L pfunt vnd viertzig pfunt^b) alles guter vnd gaber haller, die ze Costentz geng vnd gab sint, vnd sie och der gantzlich von inen gewert vnd hab si in iren redlichen nutz geben vnd bekert. Vnd das si den selben Cunratten von Hoff vnd frow Annen siner elichen frowen vnd iren erben fur sich vnd all ir erben vnd nachkomen vmb dz selb gut die vier vnd zwaintzig hundert pfunt vnd vierzig pfunt guter haller hab ze koffen geben recht vnd redlich vnd ains staten jemer werenden ewigen koffes die vesti Griessenberg⁴ gelegen in Turgo die wingartten die bongartten die wiger vnd sechs mans mad wismatz, das alles lehen ist von vnser herschafft von Osterrich, den wingartten am Blasenberg⁵, des acht juchart rebwahs ist, der lehen ist von ainem abt vnd dem gotzhus in der Richen Ow⁶, mit lut mit gut mit zins mit gelt vnd mit allen rechten nutzen und zugehorden. Vnd sint dis die lut, die darzu vnd darin gehorent, des ersten Hainrich Pfister von Hofen⁷, Johans vnd Cunratt vnd Hainrich die Pfister gebruder sin sun, Hainrich Fer von Amlikon⁸, Johans Fer sin bruder, Johans Maiger, Cunrat Dinkell, Johans Dinkell, Hainrich Bruchsell von Busnang⁹, Rudi Nagelli, Johans Schirmer, Eberli Muller, Hainrich Adlatz, Johans Bulman, Burgi Swartz von Rotahusen¹⁰, Rudolff Nienekoffen, Vlrich Kochli von Buwille¹¹, Rudolff Otten an der Hub¹², Bartelli Otten gebruder, Hainrich, Walti, Johans, Hug vnd Rudolff die Otten all funff gebruder Bartellis Otten sun, Hainrich Otten von Vilmersperg¹³, Johans, Hainrich vnd Ottli all drie gebruder Hainrichs sun, Claus im Stadell, Vlrich, Johans vnd Cunrat im Stadell gebruder sin sun, Hug im Stadell von Vilmersperg, Jakli von Aichron¹⁴, Johans Hertter von Hofen, Vlrich Hardler, Burgi Turban, Burgi von Amlikon, Johans von Bonow¹⁵, Claus, Hainrich vnd Wilhelm im Holtz¹⁶ gebruder, Albrecht Hoffman, Cunratt, Claus vnd Hans die Hoffman gebruder sin sun, Walti Koch, Johans Koch ze der Alten Clingen¹⁷. Item die lut ze Griessenberg, Hainrich Koch der Hoffer, Johans vnd Cunrat Hoffer sin sun, Hainrich Sutter, Johans Suter, Walti Lantschirmer, Cunrat im Stadell, Cunrat Engelho, Johans Wildner, Cunrat Lager, Rudolff Strub, Cunratt Strub, Johans Strub, Eberli Strub, Johans Muller, Rudolff Vogelli, Rudolff, Johans vnd Johans vnd Vlrich von Holtzhusern¹⁸ all vier gebruder. Item Hainrich Bluwell am Imenberg¹⁹, Vlrich vnd Hainrich sin sun, der ober Cuni am Imenberg, der Scherer von Wengin²⁰, Hainrich vnd Claus Rattgeben von Matzingen²¹ gebruder gesessen ze Frowenfeld²², Berschi Ratgeb, Johans Stamler, Johans Balmer, Hainrich Balmer, Vlrich Maiger von Busnang, Johans der Schmidinen sun, Hainrich Schmid des Schmitz sun, Johans Schmid sin bruder, Johans Muller, Cunratt Buttenhart ze Frowenfeld, Hainrich Wildner von Sirnnach²³, Hainrich vnd Johans Rinower gebruder, Johans Moser von Vtzwil²⁴, Jakli Blaser von Aschlikon²⁵, Johans Blaser vnd Cunrat Blaser gebruder, Johans Moser von Welhusen²⁶, Berschi Beniker ze Zurich, Cunrat mit der Gigen, Rudolff Bulman, Cunrat Bulman von Rotahusen, Hainrich Koch ze Schaffhusen²⁷, Gut der Ferinen tochter vnd zwen ir sun, Allu des Schmitz swester vnd iru kint von Holtzhuser, des Stamlers swester ze Hagenbuch²⁸ vnd iru kint, Hermans wib von Fridoltzhain²⁹ vnd iru kint, Cuni Hagenstallers wib vnd sine kint, des Vogels^c) von Trungen³⁰ wib vnd sine kint, Ann Schilingin vnd iru kint, Vlrich Sporer von Wil³¹ wib vnd kint, Hansen Zoffingers wib vnd sine kint, Hans der clein Langenhart, Cunratt Kochli, Hans Ber von Tanneg³², Hans Gochman von Rikkenbach³³, Hans Vly von Rikkenbach, Hans Ruburswiler von Rikkenbach, Zankumber von Rikenbach, Cunrat von Blaburen, Cunrat Waibell von Vtzwil, Hainrich Bachi vnd sin sun, Vlrich Schnider, Gugler schuchmacher, Cunrat Aichern vsser dem Rintall³⁴ sin wib vnd iru kint, Hans Frie vsser dem Rintall, Hainrich Frie sin sun, Cunrat Neff von Vtzwil, Hainrich Wittenwilr von Vtzwilr, Grrett Mullerin vsser dem Riet³⁵ vnd iru kind halb, Cunrat Maiigis ab der Egg³⁶, Hermans von Fridoltzen baide wib vnd kint, Wilhelm im Holtz, Allu im Holtz vnd iru kint, Haini Sumerbrun von Burglon³⁷, Hainrich Borlang von Amlikon, Mornanwegin von Stettfurt³⁸ vnd iru kint halb, Grett Mullerin am walriss von Griessenberg vnd iru kint. Item so sint dis die zins twing vnd banne, die darzu und darin gehorent, die twing vnd banne ze Rotahusen geltent jarlichs ze vogtrecht funff vnd drissig schiling pfening vnd ain malter habern Costentzer mes, des git des Bumans hoff ain pfunt pfening, Hans Bulman git zwen vnd zwaintzig pfening, Burgi Swartz git vier schiling vier pfening vnd funffthalb viertall habern, Rudi Nagelli git drie vnd zwaintzig pfening vnd zwai viertall habern, Hans Schirmer git vier schiling pfening, Hainrich Adler git zwai viertall habern, des Bun hoff git ain mut habern, Berschi Jordan von Rotahusen git vierdhalben schiling pfening vierdhalb viertall habern Costentzer mess, das alles lehen ist von dem abt vnd dem gotzhus ze sant Gallen. Item Hans Fer von Amlikon git von baiden Eggen³⁹ zechen viertall kernnen vnd zwen mut habern Costentzer mess vnd sechs schiling pfening, das och lehen ist von aim abt vnd dem gotzhus ze sant Gallen. Burgi Borlang von Amlikon git von ainem gut funfftzechen schiling pfening vnd zwen mut habern Costentzer mes, das lehen ist von Ow, Rudi Fer von Amlikon git dritzechen schiling pfening zwen mut habern Costentzer mess vom Junkholtz⁴⁰, ist lehen von Ow. Item Hainrich Suter git ain mut kernen Costentzer von den akkern ze Buch⁴¹, ist lehen von Ow, Hainrich Fer von Amlikon git zwelffthalb mut kernnen Costentzer mess vnd drissig schiling pfening von dem far ze Amlikon, ist lehen von Ow. Item die gericht twing vnd banne halb ze Marwile⁴², da der anderr halbtail gehort gen Thobell⁴³, vnd vss dem hoff ze Marwile, den ietz hett Rudi Kerman, gat jarlichs ze vogtstur funfftzechen schiling pfening, das lehen ist von Ow. Item vsser dem hoff ze Nidern Aichron⁴⁴ gat jarlichs sechs schiling pfening ze vogt stur, den ietz hett Jakli in Aichron vnd ist lehen von sant Gallen, vsser dem Venkler akker gat zwai viertall kernnen Wil mess vnd an dem dritten jar nutz, vnd ist lehen von sant Gallen. Die muli ze Griessenberg gilt jarlichs sechs mut kernnen Wil mes, ist lehen von Ow. Die widem ze Lombass⁴⁵ gilt jarlichs zechen schiling pfening vnd ist lehen von Ow. Item vsser dem hoff ze Hunikon⁴⁶, der des Bischoffs von Wil ist, gat jarlichs ze vogtstur dritthalb schiling pfening, ist lehen von sant Gallen. Der Tobellhoff ze Hoffen gilt jarlichs sechs mut kernnen vnd ain malter habern Wil mess vnd zechen schiling pfening, ist lehen von sant Gallen. Der Senninen gutli von Hoffen gilt jarlichs zwai viertall kernnen Wil mess, das ietz buwt Hans Hertter, ist lehen von sant Gallen. Claus im Stadell von Vilmarsperg git jarlichs achtzechen schiling pfening drie mut kernnen dru malter habern Costentzer mess vnd ain mut kernnen Wil mess von dem hoff ze Vilmarsperg, ist lehen von Ow. Item Hans Schnider git von dem kelnhoff vnd von dem kilchensatz mit aller zugehord ze Lutmarikon⁴⁷ drie mut kernnen drie mut habern Costentzer mess vnd vier schiling pfening, das lehen ist von Ow. Berschis Lutmarikon hoff gilt siben mut kernnen sehs mut habern Wil mess zwelff schiling pfening vnd ist lehen von Ow. Der hoff ze Bonow gilt jarlichs vier malter habern Costentzer mess drie schiling pfening, ist lehen von Ow. Die owen an der Thur⁴⁸ geltent jarlichs zwai malter habern Costentzer mess vnd sint lehen von Ow. Item vnd darzu die vogtie zwing vnd banne ze dem gotzhus ze Wagenhusen⁴⁹, geltent jarlichs viertzechen pfunt pfening vnd acht malter vesan Stainer⁵⁰ mess, vnd das si nun hinanhin kastvogt sin sont ze Wagenhusen, daz lehen ist von dem bisthum ze Costentz. Da sint die vorgenantten pfening alle Costentzer muntz vnd dz obgenant kerngelt jarlichs gut korn zins. Vnd hab och inen die vorgenantten vesti Griessenberg ze koffent geben mit den obgenantten wingartten bongartten wigern vnd wisen mit vogtien mit lut mit gut mit zins mit gelt mit lehen mit vall mit gelass mit twing mit banne mit hobtrecht mit husern mit hoffstetten mit hoffrati mit akker mit wisen mit hoffen mit holtz mit veld mit wasser mit wasserlaiti mit steg mit weg mit abweg mit getrett vnd mit allen den rechten nutzen vnd zugehorden, alz och si das alles inne gehebt besessen und genossen hett vnd alz dz alles an si komen vnd bracht ist, es sie benempt ald vnbenempt fundes ald vnfundes, wie das alles genant oder gehaisen ist, nut vss gelassen danne allain die lechenschafft, die wapens genos sint, die selben hett si ir selb vnd iren erben vss behalten, die in die selben vesti Griessenberg gehorent. Nun ware du selb fro Clement vormals och vor mir vnd vor offem gericht gewesen vnd wolte dem selben Cunratten von Hoff vnd fro Annen siner elichen frowen die obgenantten vesti Griessenberg mit allen nutzen rechten vnd zugehorden geuergett vnd vff geben haben vnd bate ir ze erfaren, wie si das tun solt, alz recht war. Do wurd mit rechter vrtall ertailt, das si zu ir stellen solt irn nachsten vattermag vnd rechten vogt oder aber, das si swur ze den hailgen, das si den nit haben mocht, das si danne das gericht beuogten solt. Do welti si nit sweren vnd batt, ir tag ze geben, nach irem vogt ze werben. Der tag ward ir och mit vrtall gegeben, vnd also ist si ietz fur mich vnd fur offen gericht komen an dem tag, alz dirre brieff geben ist, vnd zogt ainen offen versigelten brieff von dem edeln wolerbornnen heren graff Donatten von Toggenburg⁵¹ irem ocham vnd batt ir den ze verlesen. Der sait, das der selb graff Donatt von Toggenburg von ehaffter not wegen nit mit der selben siner mumen zu dem gericht komen mocht, vnd bat mich mit dem selben sinem brieff vnd die richter all, das wir die selben sin mumen beuogten solten mit ainem, des si begertti, das war sin will guter. Do fragt ich obgenantter amman vrtail vmb, was hiervmb recht war. Do ward mit rechter gesamnetter vrtaill ertailt, sider dz das ir ochan vnd rechter vogt dem amman vnd den richtern enbotten hett, das er nit zu dem gericht komen mocht, das si dann das gericht billich vnd von dem rechten beuogten solt mit ainem, des si begerti. Do begert si ze vogt des edeln vesten ritters hern Albrechtz von Burglon⁵², der ward ir och vmb die sach von des gerichtes wegen ze vogt geben. Der selb vogt nam do die selben fro Clementen zu im vnd batt inen ze erfaren, wie si die selben vesti Griessenberg mit allen den rechten vnd zugehorden, alz da vor ist beschaiden, in der selben Cunratz von Hoff vnd frow Annen siner elichen frowen handen bringen solten, alz recht war vnd dz es nun vnd hienach krafft hett nach dem rechten. Do ward mit rechter vrtall ertailt, das der selb her Albrecht von Burglon ir vogt die selben frow Clementen von Hewen geborn von Toggenburg ze drin malen vsser dem gericht furen solt vnd si ze jeglichem mall fragen solt, ob si dis verkoffen vnd vff geben vnd dz vorgeschriben alles willenklich vnd gern tat vnd tun wolt. Das vollefurt och der selb vogt mit ir vnd furt si ze jeglichem mall wider in dz gericht vnd sait vff sinen aid, das sie im ze drin malen gesait vnd vergehen hett, das si dis verkoffen vnd dis vff geben vnd dis vorgeschriben alles willenklich vnd gern tat vnd och tun wolt. Do ward mit rechter gesamnotter vrtail ertailt, wa dann du selb fro Clement von Hewen geborn von Toggenburg mit dem selben irem vogt hern Albrechten von Burglon ritter dar stunden vor offem gericht vnd die vorgenantten vesti Griessenberg mit lut vnd mit gut vnd mit aller zugehord, alz da vor ist beschaiden, in der selben Cunratz von Hoff vnd fro Annen siner elichen frowen handen vergottin vnd vff gaben vor offem gericht vnd sich alz irs rechten vorderung vnd ansprach daran ze vrtat gantzlich entzigent vnd och inen das lehen von den leheren vergotti vnd ze iren handen bracht, daran si habent warent, wenn das alles also beschach, das es dann wol durch recht krafft vnd macht hett nach dem rechten. Das alles vollefurt och du selb fro Clement mit dem selben irem vogt gen den selben Cunratten von Hoff vnd gen fro Annen siner elichen frowen vnd gen iren erben fur sich vnd ir erben vnd nachkomen, alz ir mit frag vnd mit rechter gesamnotter vrtaill ertailt ward, vnd entzech sich och du selb frow Clement von Hewen gen den selben Cunratten von Hoff vnd gen fro Annen siner elichen frowen vnd gen iren erben fur sich vnd ir erben vnd nachkomen an der selben vesti Griessenberg mit wingartten mit bongartten mit wigern mit wisen mit lut mit gut mit vogtien mit zins mit gelt mit twing mit banne vnd mit allen den rechten nutzen vnd zugehorden, alz do vor ist beschaiden, aller aigenschafft aller lehenschafft alz lihens aller vall vnd gelass aller vorderunng vnd ansprach vnd sunderlich alz des rechten, so si daran je gehebt hett oder jemer daran gewinnen mocht in dehain wis noch weg nun noch hienach mit gericht oder ane gericht gaistlichem oder weltlichem, vssgenomen die lehenschafft, die wappens genos sint, alz da vor ist beschaiden, die hett si ir selb behalten. Darzu lopt och du selb frow Clement von Hewen geborn von Toggenburg fur sich vnd ir erben vnd nachkomen mit ir truw an ains aides statt, des selben koffes der obgenantten Cunratten von Hoff vnd frow Annen siner elichen frowen vnd ir erben recht wer ze sind gen manglichem, des lehens fur lehen vnd des aigens fur aigen nach recht des landes ane all geuard, also war, ob si oder ir erben da zwuschent jemand ansprach oder si daran sumpti oder jerti, das sollent si vnd ir erben inn vnd iren erben gantzlich an ir schaden entrichen vnd inen das gantzlich ledig vnd los machen an wideredd vnd an all geuard. Vnd des alles ze warem vnd offem vrkunt aller dirre ding gib ich obgenantter Gebhart Echinger stattamman ze Costentz min insigell von des gerichttes wegen an disen brieff doch mir vnd minen erben vnschadlich, won och des vor gericht gemuttett vnd ertailt ward, vnd das in och die obgenantten frow Clement von Hewen geborn von Toggenburg vnd her Albrecht von Burglon ir vogt in dirre sach och besigelen sollent. Des vergehent och wir die vorgenantten frow Clement von Hewen geborn von Toggenburg vnd Albrecht von Burglon ritter vnd ir vogt in dirre sach ainer gantzen warhaitt alles des, so von vns baiden vnd jetwederm besunder an disem brieff verschriben ist. Vnd des ze vrkunt gebent och wir die selb fro Clement vnd Albrecht von Burglon ritter vnseru insigell an disem brieff doch mir obgenantten von Burglon ritter vnschadlich. Dirre brieff ist ze Costentz geben, do man von Cristes geburt zalt drutzechen hundert jar, darnach in dem siben vnd nuntzigesten jar, an der nachsten mittwochen vor vnser frowen tag ze mittem ogsten.