Allen^a) den, die disen brief ansehent lesent oder horent lesen, kund ich Vlrich Kuchimarr, den man nempt Vlrich Brunner, gesessen L ze Brugg¹ ob Kappell² vnd vergich offenlich mit disem brieue fur mich fur alle min erben vnd nachkomen, daz ich mit wolbeLdahtem mut vnd guter vorbetrahtung durch nutz vnd notdurft gemaines landes armer vnd richer ain offen L lantstrasse vber minen akker gelegen ze Brugg, den man nempt Holengart³, die selb strasse vber den vorgeschribenn minen akker nebent der alten strasse vf vnd ab alz wit in minen akker sin sol, das zwen wagen oder karren nebent ain ander mit gemache varen mugent, die selb nuw strasse ainhalb stosset an die alten strasse gegen Ruti³ vnd anderthalb an minen graben vnd an minen zun vff dem vorgeschribenn minem akker, redlich vnd reht aines staten ewigen koffes verkoft vnd ze koffenn geben han den wisen fursihtigen dem burgermaister dem rat vnd gemainer stat ze sant Gallen vnd allen iren erben vnd nachkomen vmb ain phunt phenning guter Costentzer munse, dero ich gantzlich vnd gar von inen gewert bin vnd enphangen han vnd an minen offenn nutz bewendet an den stetten, da ich minen wahsenden schaden mit verkomen han. Ich han in och die selben strasse zu iren handen geben vnd geuertgot, wie das kraft vnd maht sol vnd mag han ietz vnd och hie nach, mit der beschaidenhait vnd in dem rehten, daz die selben obgenanten der burgermaister der rat vnd die burger gemainlich ze sant Gallen vnd ieklicher besunder vnd alle iro erben vnd nachkomen vnd aller manglich, wer des bedarff ald notdurftig ist, die vorgeschribenen strasse vber den vorgeschribenn minen akker, den man nempt Holengart, niessen vnd daruber vf vnd nider riten gan vnd daruber varn vnd wandlen sont vnd mugent ze ross ze fuss mit schlitten mit wagen mit karren mit pflugen, wenne vnd welher zit su wellent tag vnd naht vnd wie su des bedurffent, ân geuarde, vnd daz ich noch min erben noch nachkomen su noch dehain iro erben noch nachkomen noch nieman andre daran niemer sumen ieren noch trengen sont in dehain wise. Ich han och gelobt mit miner truwe vnd loben mit disem brief fur mich vnd fur alle min erben, der vorgeschribenn strasse vber den vorgeschribenn minen akker, alz vor beschaiden ist, vnd des koffes reht wer ze sinne nach des landes reht vnd och den vorgedahten den burgermaister den rat vnd die burger gemainlich der stat ze sant Gallen vnd ir ieklichen besunder vnd iro erben vnd nachkomen darumb ze versprechenn vnd ze verstanne an allen stetten gen aller manglichem ân allen iren schaden, wenn wa vnd wie dik su darumb angesprochen geschadgot oder vfgetriben werdent mit dem rehten. Vnd dez alles ze offem warem vrkunde vnd stater sicherhait aller der vorgeschribenn dinge vnd vergiht so han ich Vlrich Kuchimarr da vorgenant erbetten die ersamen Cunrat Jochler ab der Hub⁴ vnd Vlrich Furer burger ze sant Gallen, daz su baid iru insigel fur mich fur alle min erben vnd nachkomen gehenkt hant an disen brief, vnder der selben insigel ich mich willeklich gebunden han, won ich aigens insigels niht han, des och wir die obgenanten Cunrat Jochler vnd Vlrich Furer offenlich veriehen an disem brief vns vnd allen vnseren erben gantzlich vnschadlich. Diz beschach vnd ward dirre brief geben ze sant Gallen an vnser frowen abent ze mittem ogsten in dem jar, do man zalt von Cristus geburt druzehenhundert jar, nunzig jar vnd darnach in dem sibenden jâre.