Ich^a) Gory von Wil¹ fry lantrichter zu Stulingen² von des edeln vesten mines gnedigen herren herr Hansen von Luphen³ lantgrauen ze L Stulingen tun kunt mit disem brief, alz Eberhart Holstain die burger gemainlich der statt ze Wil⁴ vnd etlich ander dez gotzhus L von sant Gallen lut vff dem lantgericht zu Stulingen in aucht erclegt vnd getan hatt, vergich ich offenlich, daz die selben L von Wil vnd alle die, so von der sach wegen zu inen gehaft sind, wie die genant ald wo sy gesessen sind, vss der selben aucht luterlich vnd ledeclich komen vnd vs dem auchtbuch geschriben sind, daz kund vnd sagen ich der obgenant Gory von Wil by dem aide, so ich dem obgenanten minem herren herr Hansen von Luphen von des lantgerichtz wegen gesworn han. Ouch vergich ich vorgenanter Gory von Wil von des egenanten mines herren wegen hern Hansen von Luphen, daz der erwirdig gaistlich herr apt Chun des gotzhus zu sant Gallen⁵ dem obgenanten minem herren hern Hansen von Luphen vnd dem lantgericht ze Stulingen volkomenlich gebessert vnd gnug getan hat von der zuspruch wegen, so er zu den von Wil hatt, vmb daz sy den egenanten Eberhart(en) Holstain zu Schauffhusen⁶ haftend vnd niderlaiten^b) in setzzen, die von dem lantgericht darrurten. Vnd darumb so lon vnd sagen ich obgenanter Gory von Wil an des egenanten mines herren herr Hansen von Luphen statt vnd fur mich selb von dez obgenanten lantgerichtz wegen vnd fur alle die, so vnsernhalp darzu gehaft sind, den obgenanten minen herren apt Chun dez gotzhus zu sant Gallen die vorgedachten von Wil vnd ander sin lut, die dis sach an rurt, der selben zuspruch aller luterlich vnd ouch gar vnd gentzlich quit ledig loz vnd vnansprechig ietz vnd hienach. Mit vrkund dis brieues, der von des obgenanten mines herren von Luphen von minen wegen vnd fur alle die, so von dez lantgerichtz vnd vnser wegen darzu gehaft sind, von dez selben lantgerichtz wegen besigelt geben ist mit dez obgenanten lantgerichtz anhangend(en) insigel dez jars, do man zalt von Cristus gepurt druzehenhundert vnd nuntzig jar vnd dar nach im sibenden jar, an dem nechsten zinstag vor aller hailgen tag.