Wir Rudolf von gottes verhengnust abt vnd gemainer couent des gotzhus ze sant Johans in dem Tural¹ sant Benedicten ordens in Costentzer bystum veriehen vnd tunt kunt allermengLlichem mit disem brief, daz wir wissentklich vnd wolbedaht mit gemainem ainhelligem rât vnsers capitels ze den ziten vnd an den stetten vnd mit aller dero gunst vnd willen, L alz wir daz durch recht wol tun soltent vnd mohtent, redlich vnd recht fur vns vnd fur alle vnser nachkomen ains vngeuarlichen ewigen kôfs verkôft haben vnsers gotzhus L hof ze Nidren Stetten², desselben hofes hofraiti bi dem Bachtobel³ gelegen ist, den man nempt Sant Johanner gut, mit hus mit hof mit hofstatt mit hofraiti mit garten mit akker mit wisen mit holtz mit veld mit wunn mit waiden mit steg mit bruggen mit wegen vnd mit allen rechten nutzen zinsen gewonhaiten vnd mit allem dem, so dar zu vnd dar in iendert gehort, vnd alz wir vnd vnser gotzhus denselben hof vntz har inne gehebt vnd genossen habent, vnd haben denselben hof also fur ledig vnansprachig aigen vnd dar fur, daz nieman nutz dar ab gang dann iarklich ain pfund pfen(ning) ze vogtstur, ains vngeuarlichen ewigen koffes ze koffent geben dem fromen man Johansen Bischof burger ze Wil⁴ vnd allen sinen erben vmb ains vnd viertzig pfund pfen(ning) alles guter vnd genamer Costentzer muns, der wir ôch aller gantzlich vnd gar nach vnserm willen vnd nach vnsers gotzhus nutz von im bezalt syent. Vnd haben im vnd sinen erben denselben hof also mit allen vorgedahten rechten vnd mit aller zugehord fur vns vnd fur alle vnser nachkomen vnd fur daz obgenant vnser gotzhus ledklich vff geben vnd zu desselben Johansen Bischofs vnd zu siner erben handen braht vnd geuertgot vnd si des in liblich nutzlich gewer gesetzt, alz recht sitt vnd gewonlich waz vnd alz daz nach vnsers gotzhus vnd nach vnsers ordens vnd ôch nach des landes recht sitten vnd gewonhait billich vnd von recht kraft vnd maht hât nu vnd hie nach. Vnd haben vns hier vber gegen demselben Johansen Bischof vnd gegen allen sinen erben an demselben hof mit aller zugehort mit gemainem ainhelligem rât vnsers capitels ledklich vnd frilich verzigen vnd verzihent vnd entwerent vns ôch redlich vnd recht mit disem brief fur vns vnd fur alle vnser nachkomen alles rechten gaistlichs vnd weltlichs gerichts aller aigenschaft aller lehenschaft aller manschaft aller erbschaft alles tails aller gemaind aller gewêr aller kuntschaft aller zugnust luten vnd aller briefen rodel vnd geschrift, so wir von desselben hofs wegen iendert haben oder hienach funden werdent, vnd darzu aller rechtung vordrung vnd ansprachen aller gesetzt gewonhait frihait vnd gnaden, so wir oder vnser gotzhus oder vnser orden von bapsten kungen kaysern oder von ieman andrem habent oder gewinnent, vnd aller andren sachen geuarden furzug vnd vsszug, dar mit wir oder vnser nachkomen oder ieman andrer von vnsern oder von vnsers gotzhus wegen den obgenanten hof mit aller zugehord gantzlich oder an dehainem tail mit gerichten oder ân gericht iemermer kundent oder mohtent angesprechen in dehain wis oder weg, so ieman erdenken kan, ân geuard. Wir sollent vnd gelobent och vestenklich mit disem brief fur vns vnd fur alle vnser nachkomen, des obgenanten hofes mit allen vorgedahten rechten vnd mit aller zugehort fur recht vnansprachig aigen vnd dar fur, daz nieman nutz dar ab gât dann iarlich ain pfund pfen(ning) ze vogtstur, vnd dis redlichen koffes des obgenanten Johansen Bischoff vnd siner erben gen allermenglichem vff gaistlichen vnd vff weltlichen gerichten vnd allenthalben, wenn wa oder wiedik si des noturftig sint vnd dar vmb mit dem rechten von ieman vffgetriben oder angesprochen wurdent, recht weren ze sint nach aigens recht vnd nach des landes sitten vnd gewonhait ân geuard. Vnd des alles ze warem offem vrkund vnd bestaten sicherhait so haben wir obgen(anter) abt Rudolf vnd gemainer couent des gotzhus ze sant Johans vnsri insigel fur vns vnd alle vnser nachkomen offenlich gehenkt an disen brief. Der geben ist in vnserm obgenanten gotzhus an dem nahsten zinstag nach sant Katherinen tag, do man zalt von Cristi geburt druzehenhundert vnd nuntzig iar, dar nach in dem sibenden jar.