Ich^a Cunrat Kuchimaister der salwurker burger ze sant Gallen tun kunt vnd vergich offenlich mit||
disem brief allen, die in sehent oder horent lesen, das ich mit wolbedahtem mut willeklich friLlich vnd vnbezwungenlich offenlich gesworn han ainen gelerten aide liplich ze got vnd ze den||
hailigen mit vfgehabenen vingern, war das ich dehainer lay sach stoss oder ansprach zu den burgern gemainlich der statt ze sant Gallen oder zu dehainem burger ald burgerinen besunder ze sant Gallen, es sien man oder frowen knaben oder tohtren, su sien ietz da selbs burger oder die hie nach da selbs burger werdent, vff disen huttigen tag, alz dirre brief ist geben, ze sprechenn hetti oder hie nach iemer ze sprechenn gewunni, daz ich noch nieman von minen wegen den selben burgern vnd burgerinen ze sant Gallen ân reht niht tun sullen noch wellen noch schaffen getan, wolti ald mohti ich aber darumb rehtes niht enbern, das ich noch nieman andre an miner statt noch von minen wegen die selben burger gemainlich noch dehainen burger noch burgerinen besunder mit dehainen fromden gerihten niht vf triben aischen noch beklagen sont, won daz ich oder min gewissi botschaft daz reht ze sant Gallen in der statt von inen nemen sol vnd wil ân alle widerred vnd ân alle geuarde, es war dann, daz ich oder min bottschaft an miner statt rehtlos gelassen wurdi vnd daz och das da kuntlichen wurdi, so ist mir behalten vnd in dem aid vss gelassen, daz ich daz reht ie danne, von dem ich oder min botschaft an miner statt rehtlos gelassen werdent, anderswa suchen sol vnd mag, da es dann billich vnd muglich ist, ân geuarde. Vnd des alles ze offem warem vrkunde aller vorgenanten dinge vnd vergicht so han ich Cunrat Kuchimaister da vorgenant min aigen insigel offenlich gehenkt an disen brief. Der geben ist ze sant Gallen an dem nahsten fritag vor dem balm tag in^b der vasten in dem jar, do man zalt von Cristus geburt vierzehenhundert jar vnd darnach in dem^c funften jare.