Ich^a Vlrich Wildrich Ôthmar Wildrichs burgers ze sant Gallen êlicher sun tun kunt vnd vergich offenlich mit||
disem brief allen, die in sehent oder horent lesen, daz ich mit wolbedahtem mut willeklich vnd vnbezwungenlich offenLlich gesworn han ainen gelerten aide liplich ze got vnd ze den hailigen mit vfgehabenen vingern, war daz ich dehainer||
lay sach stoss oder ansprach zu den burgern gemainlich der stat ze sant Gallen oder zu dehainem burger ald burgerinen besunder ze sant Gallen, es sien man oder frowen knaben oder tohtren, su sien ietz da selbs burger oder die hie nach da selbs burger werdent vff disen huttigen tag, alz dirre brief ist geben, ze sprechenn hetti oder hie nach iemer ze sprechenn gewunni, daz ich noch nieman von minen wegen den selben burgern vnd burgerinen ze sant Gallen ân reht niht tun sullen noch wellen noch schaffen getan vnd wider die selben burger gemainlich niemer ze sinne noch ze tunne ân arge list, wolti ald mohti ich aber von in rehtes nut enbern, das ich noch nieman andre an miner statt noch von minen wegen die selben burger gemainlich ze sant Gallen noch dehainen burger noch burgerinen besunder mit dehainen fromden gerihten niht vf triben aischen noch beklagen sont, won daz min gewissi botschaft an miner statt daz reht ze sant Gallen in der statt von inen nemen sol vnd wil ân widerred vnd ân alle geuarde, ez war dann, daz ich^b min botschaft an miner statt rehtlos gelassen wurdi vnd das och daz da kuntlich wurdi, so ist mir behalten vnd in dem aid vss gelassen, das ich das reht ie danne, von dem min botschaft an miner statt rehtlos gelassen werdent, anderswa suchen sol vnd mag, da es dann billich vnd muglich ist, ân alle geuarde. Vnd des ze warem vrkunde so han ich Vlrich Wildrich da vorgenant erbetten den ersamen Hugen Schulmaister burger ze sant Gallen, daz er sin insigel fur mich gehenkt hat an disen brief, vnder des insigel ich mich willeklich gebunden han, won ich aigen^c insigel nit han, des och ich obgenanter Hugo Schulmaister mir vnd minen erben ân schaden vergich an disem brief. Darnach vergich ich der obgenant Ôthmar Wildrich, das ich mit dem obgenanten Vlrich Wildrich gelobt han mit miner truwe vnd loben mit disem brief, das der obgenant Vlrich min sun allu vorgeschribenen stuk vnd artikel war vnd stat sulle halten vnd vollefuren ân arge list vnd ân alle geuarde, vnd daz das war vnd stat belibe, so han ich och min aigen insigel offenlich gehenkt an disen brief. Der geben ist ze sant Gallen an dem nahsten zinstag vor sant Vrbans tag in dem maiien des jare^d, do man zalt von Cristus geburt vierzehenhundert jar vnd darnach in dem funften jare.