Wir^a graf Fridrich von Toggenburg¹ herr in Brettengow² vnd vff Thafaus³ etc. bekennen vnd tun kunt offenlich mit disem||
brief, als wir vnser vesty Griffense⁴ mit lut vnd gut vnd mit aller ir zugehorung vmb sechs tusent guldin||
hoptgutes vnd vmb die zinse, so da von vallent, versetzet haben dien fromen wisen dem burgermeister vnd dem rat der||
statt Zurich, als der pfandbrief wol wiset, der dar uber geben vnd versigelt ist, zu der selben vesty dise nachgeschriben reben gehorten, von dien vns aber furbracht ist, das uber dieselben reben so vil kosten vnd schaden gangen sije, dz wir merklichen gebresten dar inn bekennen, vnd dar vmb so haben wir fur vns vnd vnser erben dien egenanten von Zurich gunnen vnd erlobet vnd geben inen vollen gewalt, die vorgeseiten reben ze verkoffen, vnd also hant die selben von Zurich von vnsers heissens vnd erlobens wegen die selben reben verkoffet, des ersten hant si verkoft vier juchert reben minder oder mer ze Goltpach⁵ gelegen, die selben reben die Lochman buwent, vmb druhundert vnd zwentzig guldin vnd vmb vier plaphart, aber die vier juchert reben vnd dz gut ze Herdiberg⁶ gelegen, dz man nempt im Selholtz⁷, vmb anderhalb hundert guldin, aber ein juchert reben an der Spanweid⁸ bi Zurich gelegen, die Claus Trubli buwet, vmb funfzig vnd acht guldin vnd ein klein juchert akers mit reben ze Fluntron⁹ gelegen vmb zwelf guldin, der sum uber al wirdet von dien gutern allen funfhundert vnd viertzig guldin vnd vier plaphart, das selb gelt vns vnd vnsern erben abgan sol an der summa der vorgeschriben sechs tusent guldin, vnd ensullen och wir noch vnser erben von dien vorgeschriben funfhundert vnd vierzig guldin furbas hin enkein zinse geben. Vnd dar vmb so haben wir fur vns vnd fur vnser erben vnd nachkomen mit guten truwen gelopt, dz verkoffen, so die egenanten von Zurich von der vorgeseiten guter wegen getan hant, nu vnd hie nach war vnd stat ze halten vnd da wider niemer ze tun noch schaffen getan mit gericht noch ane gericht noch mit deheinen sachen ane all arglist. Her uber ze einem offenn waren vrkund aller vorgeschribner ding so haben wir vnser insigel offenlich gehenkt an disen brief. Der geben ist an dem nechsten donstag vor vnser frowen tag ze mittem ogsten, do man zalt von Cristus geburt vierzechenhundert jar, dar nach in dem funften jare.