Wir^a dis nachgenempten Haini Gotz gemainer man, Hans Oller, Rudi Herman, Haini Ruschis, Vli Sutter schidlut tunt||
kunt vnd veriehent offenlich mit dissem brief allen den, die in ansehent oder horent lessen, von aller der stos krieg||
misshellung clag vordrung vnd ansprach wegen, so die erber lutte Vli Zumpt vnd Anna Fridowerin ze ainem tail||
vnd Rudi Fridower der selben Annen Fridowerinen elicher bruder ze dem andern tail zu ain ander ie gehept hant oder wandent ze habent bis vf disen hutigen tag, als dirre brief geben ist, von iro vaterlichen vnd muterlichem erb vnd erbschaft vnd von iro bruder salgen gult vnd erbs wegen ligentz vnd farentz, wie dz alles genant oder gehaissen ist, nutzit darinn vs genomen noch hindan gesetz in kainen weg, der stos vnd misshellung si ze baiden tailn vf vns die obgenanten funf frilich willenklich vnd vnbezwungenlich komen vnd gegangen sint, doch mit samlichen furworten, dz vns baid vorgenant tail iro truw an aines aides stat darvmb geben hant, wie wir si vmb die obgenanten stos mit vnsren spruchen enschaiden, dz si gern da bi beliben wellent vnd ain ander war vnd stat lassen vnd halten getrulich an alle geward, vnd also habent wir obgenanten funf baider tail red vnd wider red aigenlich vnd ordenlich verhort vnd vernomen vnd hant vns darnach ainhelleklich erkent vnd gesprochen, daz der vorgenant Rudi Fridower der ietzgenanten Annen Fridowerinen siner schwoster geben vnd richten sol zwelf pfund phenning vf die nagsten man fassnacht, die schierest kumpt nach gab dis briefs. Wir habent vns och furbas erkent vnd gesproch^b, dz die vorgenant Ann Fridowerin vnd Vli Zump ir elicher man den ietzgenanten Rudin Fridower an vatter vnd muter vnd an bruder erb vnd erbschaft an ligendem vnd an farendem vngesumpt vnd vndgeiert^b lasen, vnd sont noch mugent kain recht noch kain ansprach zu dem erb niemer me haben noch gewinnen weder von iro bruder gult noch von kainerlay sachen wegen. Wir obgenanten funf hant och darinn vs genomen vnd hindan gesetz ain sibenden tail in dem holtz, der ist vnd sol sin der vorgenanten Annen Fridowerinen vnd Vlis Zumpen ir elichen mans. Wir haben och vs genomen vnd hindan gesetz anfallent erb ze baiden tailn. Do nun diser spruch geschah vnd volgieng, do stalt sich die vorgenant Ann Fridowerin mit vogt vnd mit fursprechen fur mich den vorgenanten Hansen Oller keller ze Balgach¹ in offen gericht, wie recht waz, vnd gab vf vnd ferget allez ir vatter vnd muter vnd bruder erb vnd erbschaft ligentz vnd warentz dem obgenanten Rudin Fridower vnd allen inen^b geswuschergiten, wie recht vnd vrtail gab vnd als ez kraft vnd macht hat ietz vnd hie nach. Vnd enzeh sich och do vor gericht vnd enziht sich mit disem brief alles ir vatter vnd mutter vnd bruder erb vnd erbschaft ligentz vnd warentz gesuchs vnd vngesuchs wissent vnd vnwissent aller aigenschaft aller lehenschaft aller kuntschaft aller gewerr lut vnd brief alles gaistlichen vnd weltlichen rechtes aller vordrung vnd ansprach aller recht vnd rechtung, so si zu ir vatter mutter vnd bruder erb vnd erbschaft ie gehept hat oder hie nach iemer gehaben oder gewinnen mocht. Vnd darumb ward inen ain brief ertailt nach iro mutung vnd vordrung vnd dz ich den brief besiglen solt von dez gerichtes wegen. Vnd dez alles ze offem warem vrkunt vnd statter sicherhait aller vorgeschriben ding vnd geding so han ich vorgenanter richter dissen brief darvber gevestnot vnd besigelt mit minem aigem angehenkten insigel. Vnd ze noch merer sicherhait so habent wir die obgenanten Haini Götz gemainer man, Haini Ruschis vnd Vli Sutter erbetten den vorgenanten Rudin Herman, dz er sin aigen insigel von sin selbs vnd och von vnsren wegen offenlich gehenkt hat an dissen brief, dez och ich ietzgenanter Rudi Herman ofenlich vergich mir an schaden. Geben ze Balgach an vnser lieben frowen abent ze herbst in dem jar, do von Cristus geburt warent wierzehen hundert vnd darnach in dem funften jar.