Wir^a Cun von gotz gnaden abt des gotzhus ze sant Gallen¹, das ân alles mittel zugehort dem stul||
ze Rom, sant Benedicten ordens in Costentzer bistum veriehen vnd tunt kund allermenlichem mit disem||
brief, das fur vns kam ze Winterthur² in der statt vff den tag, als dirr brief geben ist, der from vest||
ritter vnser lieber ohen her Johans von Seon³ vnd offnot vor vns vnd sprach, das er wissenklilch vnd wolbedacht fur sich vnd alle sin erben ains rechten redlichen vngeuarlichen kôffes verkôfft habi den layenzehenden ze Obern Vstra⁴, der sin pfand sye von Bônstetten⁵ vmb funftzig mark silbers vnd den er also in pfandes wis von vns vnd vnserm gotzhus ze lehen habi, mit allen rechten nutzen vnd gewonheiten vnd mit allem dem, so an deheinen dingen dâr zu vnd dar in jendert gehort, nutz vssgelassen vnd habi den selben zehenden vnd den pfandschatz also ze kôffent geben dem fromen wolbescheidnen Rudolfen Kilchmater burger Zurich, der ôch do vor vns ze gegen stund, vnd sinen erben vmb anderhalb hundert guldin guter vnd gnamer an gold vnd an gewicht, dero er aller gantzlichen nach sinem nutz vnd willen von im bezalt sye, vnd nach der offnung vnd vergicht do batt vns der obgenant vnser ohen Johans von Seon ernstlich, das wir den obgenanten layenzehenden ze Obern Vstra mit allen vorgedachten rechten vnd mit aller zugehord von im vffnemen woltint an vnser hand vnd den in pfandes wis vmb vnd fur funftzig mark silbers lihen woltint dem egenanten Rudolfen Kilchmater vnd sinen erben, dar vmb erhorten wir gnadiklich sin ernstlich bett vnd nament den selben layenzehenden ze Obern Vstra vnd den pfandschatz desselben zehenden von im vff an vnser hand vnd haben den selben zehenden mit allen vorgedachten rechten vnd mit aller zugehord in pfandes wis vmb vnd fur die obgenanten funftzig mark silbers dem obgenanten Rudolf Kilchmater vnd sinen erben gelihen vnd lihent inen ôch ietz wissenklich vnd wolbedacht mit disem brief, waz wir inen von rechtz wegen dar an lihen sollen, doch vnserm gotzhus vns vnd vnsern nachkomen an allen vnsern rechten nutzen vnd guten gewonheiten vnuergriffenlich vnd gantzlich vnschadlich, vnd nach dem do verzech vnd entwert sich ôch der obgenant vnser ohen her Johans von Seon fur sich vnd alle sin erben gegen dem obgenanten Rudolfen Kilchmater vnd gegen allen sinen erben vnd verzicht vnd entwert sich ôch ietz redlich vnd recht mit disem brief aller aigenschaft aller lehenschaft aller manschaft aller pfandschaft aller gewer aller kuntschaft aller zugnust rodel vnd briefen, so von desselben zehenden vnd pfandschatz wegen ie geben sint ald hienach von jeman geben erworben ald funden mochtint werden, alles rechten gaistlichs vnd weltlichs gerichtz aller rechtung vordrung vnd ansprach, so er ald sin erben ald ieman von iren wegen zu dem selben zehenden mit allen vorgedachten rechten vnd mit aller zugehord nichtz vssgenomen vnd zu dem selben pfandschatz gantzlich ald an deheinem teil ie gehatten ald gehaben mochtent von recht ald von gewonheit ald in dehein ander wis, so ieman erdenken kan, ân geuard. Vnd lobt ôch do vor vns der selb her Johans von Seon fur sich vnd alle sin erben, des obgenanten layenzehenden ze Obern Vstra mit allen vorgedachten rechten nutzen gewonheiten vnd zugehorden nutz vssgenomen in pfandes wis, als vorbescheiden ist, vnd dis redlichen kôffs des obgenanten Rudolf Kilchmaters vnd siner erben gen aller menglichem allenthalben, wenn wa vnd wie dikk sy des nôtdurftig sint ald dar an mit dem rechten von jeman gesumpt ald geiert wurdint, recht weren ze sint vnd sy dar vmb allweg ân iren schaden ze verstend vnd ze versprechent vnd von der ansprach ze entrihent vnd ze ledgent nach dem rechten vnd nach des landes sitten vnd gewonheit ân geuard. Des alles ze warem offen vrkund so haben wir obgenempter abt Cun vnser insigel offenlich gehenkt an disen brief. Dar nach vergich ich obgenempter Johans von Seon ritter einer gantzen sichren warheit aller vorgeschribnen dingen, so der hochwirdig furst min gnadiger herr abt Cun von gotz gnaden des gotzhus ze sant Gallen von mir hieuor verjehen hat an disem brief. Vnd ze merer sicherheit vnd zugnust der selben dingen so han ich ôch min insigel fur mich vnd min erben offenlich gehenkt an disen brief. Der geben ist ze Winterthur in der stat nach Cristus geburt vierzehenhundert jar, dar nach in dem funften jar, am nechsten mentag vor sant Gallen tag.