Allen^a den, die disen brieff an sehent oder horent lesen, kund ich Rudi Wingarter amptman¹ des wolerbornen||
mins gnadigen heren graff Fridrich von Toggenburg vnd ich Elsbeth sin elichi wirtenn mit dem selben||
minem elichen man vnd rechten vôgt, als vns die edlen fryen heren her Peter vnd junkher Wolfram von||
Hewen gebruder vff einen widerkouff vmb hundert vnd sechs vnd sibentzig guldin ze kouffent geben hânt den zehenden ze dem Willa mit siner zugehord, der mit andren luten vnd gutern iro pfand ist von dem erwirdigen gotzhus ze sant Gallen, vnd vns den geuergot hânt mit des hochwirdigen fursten vnsers gnadigen herren abt Cunen von gotz genaden des gotzhus ze sant Gallen hand getâtt vnd guten willen, als der brieff wist, den wir dar vmb mit desselben vnsers gnadigen herren abt Cunen vnd mit der obgenanten vnser herren von Hewen insigeln versigelten inne hânt, da bekennen vnd veriehen wir offenlich mit disem brieff, das wir beidi fur vns vnd vnser erben mit dem selben vnserm gnadigen herren abt Cunen an siner vnd siner nachkomen statt von desselben zehenden wegen vberkomen syen vnd by vnsern truwen an gesworner aid statt gelobt haben vnd lobent ôch ietz mit disem brieff, wenn oder welhes jars, es sye vber kurtz ald vber lang, der obgenant vnser herr abt Cun ald sin nachkomen ander lut vnd guter, so die obgenanten vnser herren von Hewen von dem egenanten gotzhus ze sant Gallen ze pfand hânt, losen went, ist das die selben von Hewen ald ir erben den obgenanten zehenden ze dem Willa nit vor hin von vns widerkoufft vnd geledgot hânt, wenn denn der egenant vnser her abt Cun ald sin nachkomen vns ald vnser erben ald nachkomen dar vmb ermanent vnd vns sament vnd mit ainander werent vnd betzalent hundert vnd sechs vnd sibentzig guldin guter vnd genamer an gold vnd an gewicht vor sant Johans tags des Touffers ze sunnwendi, das wir inen denn ze stett ân allen furzug vnd widerred den obgenanten zehenden zem Willa mit aller zugehord ôch dar vmb ze losent geben vnd gantzlich ledig lassen vnd alle brieff vnd vrkund, so wir von desselben zehenden wegen inne hant, vssher geben sont, vnd wolten ouch sy die selben losung also nach dem egenanten sant Johans tag von vns ald vnsern erben tun, des sollen wir inen ouch gunnen vnd gestatten, doch also das vns der nutz von dem selben zehenden dar nach vff den nechsten herbst vnd ouch nit furo nach volgen vnd werden sol ân geuard. Sparten aber wir ald vnser erben ald nachkomen vns des in dehein wis, so sol vnd mag der obgenant abt Cun vnser herr ald sin nachkomen souil guldin, als vorbescheiden ist, zu vnsern handen legen in die muns ald an den wechsel ze Costentz ald ze Lindow² ald ze sant Gallen, vnd sont denn dar mit den obgenanten zehenden mit aller zugehord von vns vnd vnsern erben gantzlich geledgot vnd erlost hân, vnd sont ouch dannenhin alle brieff vnd vrkund, so wir denn von desselben zehenden wegen inne hânt, gantzlich tod vnd vernicht vnd dem obgenanten gotzhus ze sant Gallen furo vnschadlich sin ân geuard. Des alles ze warem offem vrkund so han ich obgenanter Rudi Wingarter min insigel fur mich vnd min erben offenlich gehenkt an disen brieff, vnd hân ich obgenante Elsbeth sin elichi wirtenn erbetten den fromen wolbescheiden Wernher Holtzhuser genant Keller von Butzotswille³, das er sin insigel fur mich gehenkt hât an disen brieff, das ouch ich der selb Wernher Holtzhuser also getân hân von ir bett wegen mir vnd minen erben vnschadlich. Geben ze Winterthur nach Cristus geburt vierzehenhundert jar, dar nach in dem sechsten jar, an dem nechsten zinstag nach sant Paulus tag, als er bekert wart.