Ich Andres Entziswiler burger ze sant Gallen bekenn mit disem brieff fur mich vnd fur alle min erben vnd nachkomen, dz ich wissenklich vnd wolbedacht von miner redlich not wegen verkoufft han ein pfund pfenning guter genemer Costentzer muntz jerlichs zins alle jar je vff sant Martis tag ze geben ald anderley muntz, so denn je ze sant Gallen geng vnd gut sind vmb win vnd vmb brot vngeuarlich, ab vnd vsser hus vnd hoffstatt hoffreiti gezimbren wingarten aker wisen holtz veld wunn weid grund vnd grat vnd allen vnd jeklichen rechten nutzen gewonheiten vnd zugehorden, die sigind genant oder vngenant, mines hoffes vnd gutes genant das Tobel¹ am Herdlin² im Rintal ob Rebstein³, das da einhalb stosset an kenel vnd anderschwa allenthalben an des spitals des heilgen geistes ze sant Gallen⁴ guter, vnd han das selb ein pfund pfenning jerlichs zinses je vff sant Martis tag ze bezalen ze kouffen geben eines staten jemer werenden ewigen kouffes den meistern vnd pflegern vnd irn nachkomen, wele die sind ald werdent, des spitales ze sant Gallen vnd zu desselben spitals handen, vnd won aber der egenempt min hoff vnd gut Tobel am Herdlin min lehen ist von Klingenberg⁵ vnd aber ich noch jeman von des obgenempten spitals wegen von krieges vnd von vnsicherheit wegen vnser lib nit steg noch weg haben, das egenennt pfund pfenning jerlichs geltes ze fertgen vnd ze enpfachen, vnd aber ich doch vnd dar vmb von des egenanten spitals wegen enpfangen vnd an minen offen nutz bekert vnd bewent han sechszehen pfund pfenning guter Cost(entze^r muntz, dar vmb hab ich gelopt vnd loben och mit disem brieffe fur mich vnd min erben, als bald sich fuget vnd got sin gnad vnd hilff da zu schibet, das dis krieg gemiltret werdent vnd man sicher mag wandlen, den geseiten jerlichen zins ze vertgen vnd ze enpfahen, das denn ich vnd min erben vnd vnser nachkomen, wer die werint, den meistern vnd pflegern des obgenempten spitales, wer die sind, das egenempt pfund pfenning jerlichs zinses vff minem vorgenanten hoff vff geben vnd vertgen zu des spitals trager handen, als ie denn recht sitt vnd gewonlich ist, vnd das der egenempt spital vnd sin furweser dar an habent sind an alle geuerd, es sig von Kleingenberg ald wo es denn notdurfftig ist, vnd all die wil die vertgung nit beschechen ist, so sond ich vnd min erben vnd ouch min hoff vnd gut des egenempten huses vnd spitals furwesen hafft vnd gebunden sin, also mit dem bedingen, gieng den vorgenempten spital da zwuschent an dem selben kouff vnd zins dehein kumber an, das si dar vmb mich vnd min erben hoff vnd gut mugen vfftriben bekumbren noten vnd das gut dar vmb angriffen vnd verkouffen je so uil vnd so lang, bis inen gnug beschicht, vnd sond ouch ich vnd min erben dis kouffes vnd zinses bis an die vertgung vnd dar nach nach lantrecht des obgenanten spitales vnd siner verwerser weren sin by guten truwen. Des alles ze warem vrkund vnd gantzer sicherheit so han ich egenempter Andres Entziswiler min eigen insigel fur mich vnd min erben offenlich gehenkt an disen brieff, wes ouch der jetzegenempt Andres Entzischwiler an disem brieff vergichtig ist vnd sich fur sich vnd sin erben bindet, das alles bekenn ouch ich Anna sin eliche wirtin vnd binden ouch mich vnd min erben, vmb alles das ouch hafft vnd wer ze sin. Des alles ze gantzer sicherheit hat der wolbescheiden Cunrat Scherer burger ze sant Gallen im selb vnd sinen erben vnschedlich disen brief von miner bett wegen versigelt fur mich vnd min erben. Der geben ist ze ingendem meyen, do man zalt von gotz geburt tusent vierhundert vnd sechs jar.