Ich^a Jos Tek von Schofflistorff¹ vergich vnd tun kund offenlich mit disem brief, das ich in namen vnd an statt des vesten||
junkher Hartmans von Rumlang² vogt ze Regensperg³ ze Otolffingen⁴ in dem dorff an offner gewonlicher richtstatt mit verbannem||
gericht offenlich ze gerichte sass, vnd kamen daselbz fur mich in gericht ze einem teil Heini Bopp von Oltoffingen mit im Metzi||
sin elich wip^b, Anna, Katerin, Bertschi, Chuni vnd Grettli ir beder elichen kind, vnd des andern teils die ersam frouw vro Angnez von Gruningen⁵ klosterfrow des gotzhus ze Wurmspach⁶ gefursprechott ze beder sitt nach recht, offnoten vnd veriachen daselbz vor mir in gericht die obgenanten Bopp sin wip vnd iro kind sy alle gemeinlich vnd vnuerscheidenlich fur sich vnd all ir erben wolbedaht gesunt sinnen lips vnd mutez, wie das sy sich entzigen hetten vnd ouch vfgeben der hub genant des Eberlis hub gelegen ze Oltolffingen in dem twing mit aller zugehort, als sy die bis her inn gehebt vnd genossen hetten, vnd gabend die ouch also vff vor mir in gericht an min hand, als vrteil gab vnd ouch twings vnd gerichts daselbz recht wz, vnd verzichen sych ouch dero gentzlich zu handen vnd gewalt der vorgenanten klosterfrowen vnd aller ir erben, vnd versprachen ouch vor mir in gericht fur sich vnd all ir erben vnd menlichen von ir wegen, die egenant klosterfrouwen ir erben noch den conuent ze Wurmspach vnd des nachkomen noch nieman, in wes hand vnd gewalt die selb hub furbz iemer kem, nicht ze vechen ze bekumbern noch an ze griffen mit gericht noch an gericht geistlichem noch weltlichem heimlich noch offenlich suss noch so in dehein wis, da durch sy beswert oder bekrent mochten werden oder die hub wust geleit, an all geuerd. Vnd versprachen ouch, dz sy truw in eidez wis ze halten vnd begabend sich, were dz sy alle oder besunder dis sach vnd versprechen nicht hieltint vnd bruchig wurdint vnd yemand anlangtint oder bekumbertton heimlich oder offenlich, als vorgeschriben statt, so soltent sy an all gnad miner gnedigen herschaft von Osterr(ic^h zu des egenanten mins^c junherren handen ir lip vnd ir gut veruallen sin ze geben. Vnd darumb hetten sy von ir genomen vnd enpfangen also par funf mut kernnen, den sy ouch zu iren handen vnd nutz gezogen hetten, des sy vor mir veriachent. Vnd nach dem do sast der selb Bopp vnd sin wip vnd ire kind fur sich vnd all ir erben die vorgenanten vro Angnesen vnd all ir erben den conuent vnd all sin nachkomen der selben hub mit aller ir zugehort in recht nutzlich ruwig gewer mit disem brief, sy inn ze haben ze nutzen ze niessen ze besetzen vnd entsetzen als ander ir eigen vnd vnansprechig gut an irrung vnd inuell menlichs, lopten ouch alle vnuerscheidenlich dirr vffgab des egenanten gutzz vnd aller sach, so vorgeschriben statt, recht weren ze sind vnd inen gantz volkomen werschaft darumb ze tund an allen stetten, da sy des notdurftig werdent, an all widerred ane geuerd. Hie by warent her Johs. von Kussenberg⁷ conuent bruder ze Wettingen⁸, Wernna Meyer, Hans Spiler, Vli Grauf, Claus Huber, Hs. Muller, Heini Dahinden vnd Rudy von Geiss alle von Wurthenloz⁹ vnd ander erber lute vil. Dez ze warem vrkund hab ich obgenanter richterr von gerichts wegen, als vrteil gab, vnd durch bett willen beder teiln des vorgenanten minez junkherren insigel offenlich gehenkt an disen brief. Der geben ist vff donstag nechst vor sant Oswaltz tag nach Cristi geburt viertzechenhundert vnd darnach in dem sechsten jare.