Ich^a Rudolf von Magelsperg¹ von Bernang² vergich vnd tun kunt allen den, die disen brief sehent oder horrent lesen,||
vnd vergich offenlich mit disem brief fur mich vnd alle min erben, daz^b ich mit guter vorbetrahtung von miner ehafter||
redlicher not wegen reht vnd redlich aines staten jemerwerenden ewigen kofs verkoft vnd ze koffen geben han der||
fromen ersamen frô Elzbethen der Ascherin burgerin ze Bischoffcell³ wilunt Rudis Aschers selgen elichu tohter vnd ir erben, ob si enwer, minen aigen hof vnd gut gelegen ze Nidra Ach⁴ mit hus mit hof mit ackern mit wisen mit holtz mit veld mit stok mit stain mit wun^c mit waid mit stagen mit wagen mit wassergengen mit wasserfluzzen vnd runsen vnd mit allen rehten nutzen diensten gewanhaiten vnd allen zugehorden, als ich das selb gut vntz her inne gehept vnd genossen han, vnd stosset an der faltsiechen gut von Costentz⁵ vnd an des spitals gut von sant Gallen⁶, in dem selben gut zwen ackern gelegen sint, die man nemet der Basen gut⁷, die lehen sint von ainem bischoff ze Costentz, vnd das ander alles reht lehen ist von dem gotzhus ze sant Gallen, von den ich dis alles vntz her ze lehen gehept han. Vnd ist der koff aller beschahen vnd vollefurt vmb zwai vnd nuntzig pfunt vnd zehen schilling alles guter Costentzer phenning, dero ich och gar vnd gantzlich bezalt vnd gewert bin vnd minen nutz damit gefurdert, vnd han mich vnd alle min erben des selben gutz gar vnd gantzlich enzigen vnd enzihe vns des mit vrkunt vnd kraft diss briefs aller aygenschaft aller lehenschaft aller manschaft aller zugnuss vnd hilf lut vnd brief aller vordrung vnd ansprach vnd aller reht, so ich oder min erben oder jeman ander von vnser wegen dar zu nu hinnenhin jemer han oder gewinnen mohtin vff allen gaistlichen vnd weltlichen gerihten oder an reht, vnd han och das selb gut alles der obgenanten frô Elsbethen Ascherin vor den obgenanten lenherren mit miner hant vfgeben vnd zu ir vnd ir erben hant braht mit lehenschaft vnd mit allen andren warten vnd warken, als es och nuhinnenhin nach gab diss briefs kraf vnd maht han sol vor allen lenherren vor allen gerihten vnd vor manklichem, wa si des notdurftig sint, vnd han och mit miner truw in aydes wise gelopt vnd verhaissen, des selben kofs vnd dar vf reht wer ze sin ich vnd min erben vnd du selben frowen oder ir erben dar vmb vff allen gerihten ze verstan nach dem rehten, als vil vnd als dik vnd sin du selb fro Elzbeth Ascherin oder ir erben bedurfent, an allen ir schaden. Des alles ze warem vnd offem vrkunt han ich der selb Rudolf von Magelsperg min aygen insigel fur mich vnd alle min erben offenlich gehenkt an disen brief. Der geben ist ze Bischoffcell am nahsten donstag nach sant Francischus tag in dem jar, do man zalt von Cristi geburt vierzehenhundert vnd sehss jar.