Ich^a Hans Sternegg burger ze sant Gallen tun kunt vnd vergich offenlich mit disem brief allen, die in sehent oder horent lesen, alz mich die wisen||
der burgermaister vnd der rat ze sant Gallen gehainmot vnd in iro vanknuss vnd banden hatten vmb daz ich wider si getan hatt, alz ich||
der pfister zunft ain pantzer verfandert vnd versetzt hatt, daz si mir gelihen hatten. Won aber su mich von miner vnd ander erber||
lut bett begnadot vnd vss der vanknuss gelassen hant, darumb so han ich willeklich frilich vnd vnbezwungenlich offenlich gesworn ainen gelerten aide liplich zu got vnd zu den hailigen mit vfgehabenen vingern, vmb die vorgedahten vanknuss vnd getat der obgenanten des burgermaisters des rates vnd aller burger vnd burgerinen gemainlich der statt ze sant Gallen vnd ir ieklichs besunder vnd mit namen aller dero, wer die sint, die an der selben miner vanknuss vnd getat schuld gehebt hett hainlich oder offenlich mit raten oder mit getaten ald in dehain wise, luter gantz vnd gut frund ze sinne vnd all min frund inen darumb ze frund ze gewinnen ân allen furzug vnd die selben vanknuss vnd getat niemer ze andenn noch ze aferrenn weder mit geriht noch ân geriht mit worten noch mit werken noch in dehain wise noch nieman andre an miner statt noch von minen wegen ân geuarde. Ich han och in den vorgeschribenn aid genomen vnd gesworn, war daz ich dehain stoss oder zuspruch ietz hetti oder hie nach iemer gewunni zu den burgern gemainlich ze sant Gallen oder zu dehainem burger ald burgerinen besunder ze sant Gallen, daz ich darumb reht nemen sol vnd wil ze sant Gallen in der statt vor irem geriht nach ir statt reht vnd gewonhait, ez war dann, daz ich da selbs rehtlos gelassen wurd vnd och das kuntlich wurd, so ist mir behalten vnd in dem aid vss gelassen, daz ich das reht, von dem ich dann also rehtlos gelassen wurd, anderswa suchen sol vnd mag, da es dann muglich vnd billich ist, ân geuarde. Beschach och, da vor got sie, daz ich den vorgeschribenen aid iemer vber furi vnd vber sahi an dehainen sache, wenn oder wa daz beschach vnd kuntlich wurd, daz ich danne gen den obgenanten burgern ze sant Gallen erlos vnd rehtlos sin vnd haissen sol ân alle widerred. Vnd des alles ze warem vrkunde so han ich Hans Sternegg da vorgenant erbetten den ersamen Hansen Vogel den kupfersmit och burger ze sant Gallen, daz er sin insigel fur mich gehenkt hat an disen brief, vnder des insigel ich mich in diser sach willeklich gebunden han, won ich aigens insigels niht han, des och ich obgenanter Hans Vogel mir vnd minen erben ân schaden vergich an disem brief. Der geben ist ze sant Gallen an sant Katherinen tag in dem jar, do man zalt von Cristus geburt vierzehenhundert jar vnd darnach in dem sechsten jare.