Allen^a den, die disen brieff ansehent oder horent lesen, kund ich Cuni Wagner von Aschlikon¹, als der erwirdig herr her Johans von||
Bussnang brobst des gotzhus ze sant Gallen² mir vnd minen erben fur sich vnd sin nachkomen mit gunst vnd willen der||
erwirdigen herren abt Cuns vnd gemeins cappittels desselben gotzhus ze sant Gallen³ eins vngeuarlich ewigen kouffes||
fur recht eigen ze kouffent geben hât ainen mut kernen jarlichs zinses vnd geltz ab vnd vsser einem gutli genant der von Sternegg⁴ gutli ze dem Wille⁵ ob Rikenbach⁶ in dem hof, den man nempt der von Sternegg hof, gelegen, als der kouff brieff wol wiset, den ich dar vmb mit iren insigeln versigelten inne hân, da bekennen vnd vergich ich offenlich mit disem brieff fur mich vnd all min erben, das ich dem selben minem herren dem brobst von sant Gallen vnd allen sinen nachkomen an der selben brobstty vnd ouch den obgenanten minen herren dem abt vnd cappittel desselben gotzhus vnd iren nachkomen fur mich vnd alle min erben den vollen gewalt vnd das recht wissenklich vnd wolbedacht geben hân^b vnd gib ouch ietz mit disem brieff, also wenn ald welhes iars sy ald iro deheiner vnder inen ald ir nachkomen mir ald minen erben sament vnd mit einander werent vnd bezalent zehen pfund pfenning guter vnd genamer Costentzer muns ald anderley guter muns, die denn darfur ze Costentz geng vnd gab ist, vor sant Johans tag des Touffers ze sunnwendi, das ich vnd min erben vnd nachkomen, in der hand vnd gewalt denn der selb mut kernen geltz stât, inen denn den selben mut kernen geltz ân allen furzug vnd widerred dar vmb wider ze kouffent geben vnd gantzlich ledig vnd los lassen vnd den kouffbrieff, so ich ietz dar vmb inne hân, vssher geben sont. Beschach aber, das wir vns desselben widerkouffes in dehein wis spartin, so sy den also von vns tun wolten, wenn sy denn souil geltes, als vorbescheiden ist, gen Costentz in die muns ald an den wechsel zu vnsern handen gelegent, so sol inen denn ze stett der obgenant mut kernen geltz dar mit gantzlich ledig vnd los vnd der obgenant kouffbrieff dannenhin, wo er gezoigt wirt, tod vnd krafftlos sin ân geuard. Wolten ouch sy den selben widerkouff deheines iars also von mir ald minen erben ald nachkomen nach dem obgenanten sant Johans tag tun, des sollen wir inen ouch ân alle widerred gestatten in solicher masz, als vor bescheiden ist, doch also das vns derselb mut kern dar nach vff den nechsten herbst vnd ouch nit furbass nach volgen vnd werden sol, alles luterlich ân geuard. Des alles ze warem offem vrkund, won ich denn eiges insigels nit hân, so hab ich erbetten den erwirdigen geistlichen minen gnadigen herren abt Johansen des gotzhus ze Vischinen⁷ vnd den wolbescheiden Cunraten Grossman vôgt ze Tannegg⁸, das sy iro insigel fur mich vnd min erben vnd nachkomen offenlich gehenkt hânt an disen brieff, das ouch wir dieselben abt Johans vnd Cunrat Grossman also getân haben von siner bett wegen, vns vnd vnsern erben vnd nachkomen vnschadlich. Geben ze Wil⁹ nach Cristus geburt vierzehenhundert jar, dar nach in dem sechsten jar, an dem nechsten samstag nach sant Cunratz tag des heilgen bischoffs.