Wir^a Cun von gotz gnaden abt des gotzhus ze sant Gallen¹, daz an alles mittel zu gehort dem stul ze Rom, tund||
kund vnd veriehent offenlich mit disem brief mangklichem, das fur vns kam in vnsers gotzhus statt ze Wil² der ersam||
priester herr Rudolf Hofakkrer von sant Gallen vnd offnat vor vns, wie daz er ainen wingarten gelegen ze Luchingen³||
entzwuschen spitaler ze sant Gallen⁴ wingarten, der ettwenn Herman Spanhartz gewesen wari vnd anderthalb stossi an maister Johansen Schedlers der kind schulmaister ze sant Gallen⁵ wingarten, der och von dem selben wingarten getailet sy, der von vns vnd vnserm vorgenanten gotzhus ze sant Gallen sin reht lehen gewesen sy vnd den man nemmi den wingarten an dem Bul⁶, dem ersamen herr Hansen dem Kumber ze disen ziten lutpriester ze sant Gallen vnd Claren siner elichen muter vnd och Agnesen siner elichen swoster vnd iren erben ze koffenn geben hetti aines ewigen staten iemerwerenden vnd vnwiderruffentlichen koffes, vnd gab vns do ze mal der selb her Rudolf den vorgenanten wingarten am Bul mit aller zu gehord ledklich vnd frilich vff an vnser hand fur sich vnd alle sin erben, vnd batt vns ernstlich den selben wingarten mit aller zu gehord ze lihenn dem vorgenampten herr Hansen Kumber ze disen ziten lutpriester ze sant Gallen, Claren siner elichen muter vnd Agnesen siner elichen swoster in allen drin gemainlich vnd vnuerschaidenlich ze lihenn ze rehtem lehen vnd ze ainer rehten gemaind. Darvmb erhortand wir da sin ernstlich bett vnd lihent vnd sendent mit vrkund diss briefs den vorgeschribnen wingarten genempt an dem Bul ze Luchingen gelegen mit aller zugehord den vorgenanten herr Hansen Kumber, Claren siner elichen muter vnd Agnesen siner elichen swoster allen dryen gemainlich vnd vnuerschaidenlich ze rehtem lehen vnd ze ainer rehten gemaind vnd in gemaind wis, was wir inen daran durch reht lihen sont, vns vnd vnserm vorgenanten gotzhus ze sant Gallen an dem winzehenden, der vnserm vorgenanten gotzhus darvs jarlich gat, gantzlich vnschadlich vnd vnuergriffenlich. Och habent wir dem vorgenanten herr Hansen Kumber, Claren siner elichen muter vnd Agnesen siner elichen swoster die besunder gnad getan vnd dz frye manreht geben mit disem brief, das sy allu dru vnd ieklichs besunder, so es ze schulden kumpt vnd von ainnem an daz ander^b der selb wingart geuieli, den selben wingarten haben niessen besetzzen vnd entsetzzen sond vnd mugent ze gelicher wis vnd in allem rehten, als ob der selb herr Hans ain weltlich man vnd sin vorgeschribnu muter vnd swoster knaben warin. Vnd des ze offnem vnd warem vrkund habent wir vnser abtye insigel offenlich gehenkt an disen brief. Der geben ist an sant Lutzyen tag nach Cristi geburt vierzehenhundert jar vnd dar nach in dem sehsten jare.